ایرانی میزائل یورپ اور امریکہ تک پہنچ سکتے ہیں، میجر جنرل امیر حیات مقدم کا دعویٰ

شیعیت نیوز : ایرانی پارلیمنٹ میں قومی سلامتی اور خارجہ پالیسی کمیٹی کے رکن میجر جنرل امیر حیات مقدم نے کہا ہے کہ ایرانی میزائل برطانیہ، فرانس، جرمنی، مغربی و مشرقی یورپ کو نشانہ بنا سکتے ہیں۔ خارج از امکان نہیں کہ آئندہ ایرانی میزائل واشنگٹن اور نیویارک تک پہنچیں۔

رپورٹ کے مطابق یہ بیان ایسے وقت میں سامنے آیا ہے جب برطانیہ، فرانس اور جرمنی نے عندیہ دیا ہے کہ وہ ایران پر اقوام متحدہ کی پابندیاں دوبارہ عائد کرنے کے لیے تیار ہیں۔

یہ بھی پڑھیں : اسرائیل کا بڑا فوجی اقدام: غزہ پر قبضے کے منصوبے کے لیے 60 ہزار ریزرو اہلکار طلب

ایرانی رکن پارلیمنٹ امیر حیات مقدم نے کہا: اسلامی انقلابی گارڈ کور (IRGC) کی ایرو اسپیس فورس نے گزشتہ 20 سالوں سے ایرانی جنگی و بحری جہازوں کے ذریعے حملے کرنے کی صلاحیت پر کام کیا ہے۔

انہوں نے مزید کہا: ہم اپنے جہازوں کو امریکہ کے 2 ہزار کلومیٹر کے فاصلے تک لے جا سکتے ہیں اور وہاں سے واشنگٹن، نیویارک اور دیگر شہروں کو نشانہ بنا سکتے ہیں۔

میجر جنرل امیر حیات مقدم نے یہ بھی دعویٰ کیا کہ فی الوقت تمام یورپی ممالک ہماری رینج میں ہیں۔

واضح رہے کہ برطانیہ، فرانس اور جرمنی نے باضابطہ طور پر ایران کو خبردار کیا ہے کہ اگر وہ اگست کے اختتام تک جوہری مذاکرات میں واپس نہ آیا تو وہ اقوام متحدہ کی پابندیوں کی بحالی کا عمل شروع کر دیں گے۔ یہ وہ پابندیاں ہیں جو 2015ء کے معاہدے کے تحت اٹھائی گئی تھیں۔