محرم الحرام کا آغاز، کربلا کا پیغام اتحاد و مزاحمت کا عہد یاد دلاتا ہے: سینیٹر علامہ راجہ ناصر عباس

شیعیت نیوز : محرم الحرام 1447ھ کے آغاز پر چیئرمین مجلس وحدت مسلمین پاکستان، سینیٹر علامہ راجہ ناصر عباس جعفری نے قوم کے نام ایک پیغام جاری کیا ہے۔ انہوں نے کہا کہ محرم الحرام 1447ھ کا چاند ہمیں ایک بار پھر کربلا کے اُس لازوال پیغام کی یاد دلاتا ہے جو نواسۂ رسول، سید الشہداء حضرت امام حسین علیہ السلام نے ظلم و جبر، فسطائیت اور طاغوت کے مقابل میں حق، عدل اور انسانیت کے تحفظ کے لیے پیش کیا۔ کربلا صرف ایک تاریخی واقعہ نہیں، بلکہ ہر دور کے ظالم و مظلوم کے درمیان ایک روشن معیار ہے۔

انہوں نے کہا کہ آج جب امتِ مسلمہ عالم بھر میں آزمائش، جارحیت اور فرقہ واریت کا شکار ہے، محرم الحرام ہمیں دعوت دیتا ہے کہ ہم اپنے فروعی اختلافات کو پسِ پشت ڈال کر اتحاد و اتفاق، صبر و استقامت، اور ظالم کے خلاف مشترکہ جدوجہد کا عہد کریں۔

یہ بھی پڑھیں : انجینئر حمید حسین کی وزیر اعظم سے اہم ملاقات، کرم کی صورتحال پر فوری اقدام کا مطالبہ

سینیٹر راجہ ناصر عباس نے کہا کہ کربلا نے ہمیں سکھایا کہ ظلم چاہے کسی بھی شکل میں ہو، اس کے خلاف آواز بلند کرنا ایمان کا تقاضا ہے۔ اور یہ بھی کہ ملت کی بقا، وحدت اور باہمی احترام میں مضمر ہے۔ دشمنانِ اسلام امت کو کمزور کرنے کے لیے ہمیں فرقہ واریت، لسانیت اور تعصب میں الجھانا چاہتے ہیں، مگر امام حسینؑ کا پیغام ہے کہ امت کی طاقت اُس کے اتحاد میں ہے۔

انہوں نے امتِ مسلمہ سے اپیل کی کہ وہ اس محرم الحرام پر عہد کریں کہ:

• کسی بھی مسلک، مکتب یا عقیدے کی توہین سے گریز کریں؛

• مساجد، امام بارگاہوں اور عبادت گاہوں کا تقدس قائم رکھیں؛

• مظلومینِ عالم، خصوصاً فلسطین، لبنان، کشمیر، یمن اور دنیا بھر کے مظلوم مسلمانوں کی حمایت میں یک زبان ہوں؛

• اسلام دشمن قوتوں کے مقابل امت کے شیرازے کو بکھرنے نہ دیں۔

سینیٹر راجہ ناصر عباس جعفری نے آخر میں دعا کی کہ خدا کرے کہ یہ محرم الحرام امتِ مسلمہ کے لیے بیداری، وحدت، نصرتِ حق اور ظالموں کے زوال کا پیغام لے کر آئے۔
"انسان کو بیدار تو ہو لینے دو، ہر قوم پکارے گی ہمارے ہیں حسین”