حکومت پنجاب نے مشی کو روکنے کی حماقت کی تو سینوں پر گولیاں کھا کر جلوسوں میں شرکت کریں گے، علامہ راجہ ناصر عباس

شیعیت نیوز : اس محرم میں اہل منبر امامت کے اسلوب حکومت و سیاست لوگوں کے سامنے بیان کریں، چودہ سو سالوں سے نواسہ رسولؐ امام حسینؑ کی یاد میں عزاداری جاری ہے لیکن افسوس ہمارے ملک میں یزیدی طرز پر عزاداری کے خلاف مقدمے درج ہوتے ہیں۔

ایسے ایسے علماء و ذاکرین پر پابندیاں عائد کی جاتی ہیں، ان کی زبان بندی اور ضلعی بدری کے احکامات جاری ہوتے ہیں جہیں فوت ہوئے بھی دہائیاں گزر چکی ہیں۔

ان خیالات کا اظہار چیئرمین مجلس وحدت مسلمین علامہ راجہ ناصر عباس جعفری نے کراچی کی مسجد و امام بارگاہ خیر العمل انچولی میں منعقدہ عزاداری کانفرنس سے خطاب میں کیا۔

پنجاب میں سبیلوں کے اہتمام پر ایف آئی آر، جلوس و مجلس کے انعقاد پر ایف آئی آر، جلوس میں چند منٹ کی تاخیر کے سبب بانی کے خلاف مقدمے کا اندراج یہ سب یزیدی اور شمری طرز حکومت کے انداز ہیں۔

عزاداری ہماری آئینی، قانونی اور شہری حق ہے جس پر کوئی سمجھوتہ نہیں ہوسکتا، وفاقی و صوبائی حکومتیں عزاداران امام حسینؑ کی ہر ممکن سہولیات کو یقینی بنائیں۔

جلوس و مجالس کے روٹس پر صفائی ستھرائی اور لائٹنگ کے موثر انتظامات کی ضرورت ہے، نیپرا کے الیکٹرک اور دیگر بجلی فراہم کرنے والے اداروں کو پابند کیا جائے کہ وہ محرم الحرام میں لوڈشیڈنگ کا خاتمہ یقینی بنائیں۔

اس محرم میں پہلے سے زیادہ مظلوموں کی حمایت میں آواز بلند ہوگی، شیعہ سنی مل کر نواسہ رسولؑ کی یاد منائیں گے، یہ ہماری مشترکہ میراث ہے اور ہمیں اس کا تحفظ کرنا ہے۔

خطہ میں ایرانی حکومت و شہداء نے جرائت اور جواں مردی کی جو مثال قائم کی ہے اس کی نظیر تاریخ میں نہیں ملتی۔

یہ بھی پڑھیں : ایرانی قوم جذبہ شہادت سے سرشار ہے، اسرائیل گھٹنے ٹیک دے گا، صدر سنی تحریک پاکستان

انہیں طویل استقامت کے نتیجے میں ظالم اسرائیل کے سامنے سر نا جھکا کر خود کو بے مثال بنا دیا ہے، خطہ میں موجود تمام اسلامی ممالک اور عالم انسانیت صہیونی جرائم کے خلاف متحد ہیں۔

انہوں نے کہا کہ اس سال کا محرم بہت زیادہ اہمیت کا حامل ہے، امام علی ؑ کہتے ہیں جو اپنے زمانے کو پہچان لے وہ محفوظ ہوجاتا ہے اس دور کو پہچاننے کی ضروری ہے، ہمیں دیکھنا ہوگا کہ معرکہء حق و باطل میں آج ہم کہاں کھڑے ہیں؟

غاصب اسرائیل کے مقابلے پر ملت ایران و رہبر معظم کے ساتھ کھڑے ہونے کی ضرورت ہے۔

غاصب اسرائیل سے جنگ حق و باطل کی جنگ ہے۔

قیادت سب سے اہم معاملہ ہے، دوسرا مسئلہ منشور ہے جو اہلیبیت ؑ نے ہمیں بیان کیا ہے، تیسرا عوام کا ساتھ دینا ضروری ہے۔

سب سے مشکل امتحان سیاسی میدان ہے، ظالموں کی سیاست محض اقتدار کے لئے ہوتی ہے۔

پاکستان کو پاور پولیٹکس نے برباد کیا، عزاداری کو کوئی ختم نہیں کرسکتا ہے۔

امام حسینؑ کا سجدے میں سر کٹانا خدا کے ہونے کی سب سے بڑی دلیل ہے۔

پنجاب حکومت نے مشی کو روکنے کی حماقت کی تو سینوں پر گولیاں کھاکر جلوسوں میں شرکت کریں گے۔