ایران ڈپلومیسی اور مذاکرات کے لیے تیار، لیکن برابری کی بنیاد پر، ایرانی وزیر خارجہ

شیعیت نیوز: وزیر خارجہ سید عباس عراقچی نے نئے ہجری شمسی سال کے آغاز پر اپنے پیغام نوروز میں کہا ہے کہ ہم اسلامی جمہوریہ ایران میں گفتگو اور ڈپلومیسی کے پابند ہیں۔ انہوں نے کہا ہے کہ ہم سمجھتے ہیں کہ ڈپلومیسی، یکطرفہ پالیسیوں، غیر منصفانہ دباؤ، ظالمانہ پابندیوں اور دھمکیوں نیز رعب جمانے کی کوششوں کا مناسب ترین متبادل ہے۔ انہوں نے کہا ہے کہ اسلامی جمہوریہ ایران ہمیشہ گفتگو اور مذاکرات کے لیے تیار ہے، لیکن مذاکرات برابری کی بنیاد پر اور اس طرح ہونے چاہئیں جن سے ایرانی عوام کے مفادات پورے ہوتے ہوں۔

یہ بھی پڑھیں: امریکی ڈرون کی یمنی ہوائی حدود کی خلاف ورزی، یمن نے ڈرون مار گرایا

وزیر خارجہ سید عباس عراقچی نے اس بات پر زور دیتے ہوئے کہ ہم اپنی اس پالیسی کے بدستور پابند ہیں، کہا کہ ایرانی قوم ایک شریف، باعزت اور خود اعتماد قوم ہے اور خدا کے سوا کسی کے بھی سامنے سر تسلیم خم نہیں کرتی۔ انہوں نے کہا کہ ہم نئے ہجری شمسی سال میں اسی منطقی بنیاد پر، خدا کی نصرت سے اسلامی جمہوریہ ایران کی خارجہ پالیسی کو آگے بڑھائیں گے۔ انہوں نے کہا کہ ہم ایرانی قوم کے مفاد سے ذرہ برابر پیچھے نہیں ہٹیں گے۔

وزیر خارجہ سید عباس عراقچی نے امید ظاہر کی کہ نیا ہجری شمسی سال ایرانی عوام کی خدمت کے لیے بہترین سال ہوگا اور مجھے پوری امید ہے کہ ہم اس سال ایرانی عوام کے لیے بلند ترین اور اعلیٰ ترین اہداف کے حصول میں کامیاب رہیں گے۔