انقلاب اسلامی دنیا کے مظلوموں کے لیے امید کی کرن ہے، سینیٹر علامہ راجہ ناصر عباس جعفری

شیعیت نیوز: چیئرمین مجلسِ وحدت مسلمین پاکستان سینیٹر علامہ راجہ ناصر عباس جعفری نے انقلاب اسلامی کی 46ویں سالگرہ کے موقع پر اپنے بیان میں کہا ہے کہ میں اس روشن، مقبول اور اسلامی انقلاب کی قابل فخر فتح کے موقع پر مقام معظم رہبری، ایرانی قوم سمیت ظلم واستبداد کے سامنے ڈٹ جانے والے تمام انسانوں کی خدمت میں دلی مبارکباد پیش کرتا ہوں، جس نے دنیا کے تمام مظلوم مسلمانوں اور آزادی کے متلاشیوں کے لیے امید کی کرن پیدا کر دی۔

اس عظیم الشان انقلاب سے تحریک و رہنمائی لیتے ہوئے نہتے فلسطینی اور لبنانیوں نے غاصب اسرائیل کی طاقت کو خاک میں ملا دیا۔ میں امام خمینی قدس سرہ کی عظیم اور آزاد روح اور تمام شہدائے اسلام، شہدائے انقلاب اسلامی‌ و تحریک مقاومت کو دل کی گہرائیوں سے خراج عقیدت وسلام پیش کرتا ہوں۔ دعاگو ہوں کہ خداوند متعال اسلامی جمہوریہ ایران کے اقتدار اور وقار میں مزید اضافہ کرے اور اس انقلاب کو عالم انسانیت کے نجات دہندہ حضرت امام مہدی علیہ السلام کے انقلاب سے متصل کر دے۔

یہ بھی پڑھیں: نیتن یاہو کا سعودی عرب کو اپنی سرزمین پر فلسیطینی ریاست کے قیام کا مضحکہ خیز مشورہ

انہوں نے کہا کہ انقلاب ایران حقیقی اسلام کی سربلندی اور مرجعیت کی فتح کے اعلان کا دن ہے۔ آیت اللہ العظمٰی امام روح اللہ موسوی خمینی نے اپنی حکمت، تدبر اور بصیرت سے پوری دنیا کے سامنے اسلام کی حقانیت کو منوایا۔ عالم اسلام کے اس عظیم اور نڈر قائد نے جس استقامت اور جرات کے ساتھ انقلاب برپا کیا، تاریخ اسے ہمیشہ سنہری الفاظ میں یاد رکھے گی۔

عالم کفر کو سب سے زیادہ خطرہ اس نظام ولایت سے ہے، جس کے سب سے مضبوط مدافعین مراجع عظام ہیں۔ مرجعیت کے ہاتھوں مختلف میدانوں میں شرمناک شکست کے بعد عالمی غنڈوں نے اپنی توپوں کا رخ مرجعیت کی طرف موڑ دیا ہے۔ خودساختہ پروپیگنڈوں کے ذریعے لوگوں کو ان الہی قوتوں سے متنفر کرنے کی کوشش کی جا رہی ہے، جو حقیقی معنوں میں اسلام کے عظیم مجاہد ہیں۔

انقلاب ایران کے بعد پوری دنیا میں اسلام ناب کا وقار بلند ہوا ہے۔ انقلاب اسلامی طاغوتی و استعماری قوتوں اور ان کے آلہ کاروں کی الہی طاقت کے ہاتھوں ذلت آمیز شکست کا نام ہے۔ آج دنیا بھر کی دجالی طاقتیں عالم اسلام کے خلاف برسرپیکار ہیں، انہیں شکست دینے کے لیے اس عاشورائی فکر کو اپنانا ہوگا، جس کا اظہار امام خمینی رضوان اللہ علیہ نے اپنے کردار و عمل سے کیا۔