سینیٹر علامہ راجہ ناصرعباس ودیگر اپوزیشن قیادت کا ملک میں از سر نو انتخابات کا مطالبہ

شیعیت نیوز : سابق اسپیکر قومی اسمبلی و مرکزی رہنما پاکستان تحریک انصاف اسد قیصر کی جانب سے اپوزیشن قائدین کے اعزاز میں اپنی رہائش گاہ پر عشائیہ دیا گیا۔

اس موقع پر اجلاس بھی منعقد ہوا جس میں سربراہ پشتونخوا ملی عوامی پارٹی و تحریک تحفظ آئین پاکستان محمود خان اچکزئی، سربراہ مجلس وحدت مسلمین پاکستان سینیٹر علامہ راجہ ناصر عباس جعفری، سربراہ سنی اتحاد کونسل صاحبزادہ حامد رضا، سربراہ جمعیت علمائے اسلام مولانا فضل الرحمن، اپوزیشن لیڈر قومی اسمبلی عمر ایوب خان، سابق وزیر اعظم پاکستان شاہد خاقان عباسی، سینئر سیاستدان مصطفیٰ نواز کھوکھر، اپوزیشن لیڈر سینیٹ شبلی فراز، چیئرمین پبلک اکاؤنٹس کمیٹی و صدر پی ٹی آئی خیبر پختونخوا جنید اکبر خان، ترجمان تحریک تحفظ آئین پاکستان اخونزادہ حسین و دیگر قائدین شریک تھے۔

اجلاس میں ملک کی مجموعی سیاسی صورتحال پر مفصل گفتگو ہوئی اور وطن عزیز کو درپیش مسائل کا تفصیلی احاطہ کیا گیا۔ تمام جماعتوں نے متفقہ طور پر اس مؤقف کا اعادہ کیا کہ موجودہ حکومت غیر نمائندہ ہے جسے زبردستی عوام پر مسلط کیا گیا ہے۔

یہ بھی پڑھیں : ملی یکجہتی کونسل شمالی پنجاب کا پہلا اجلاس، یوم کشمیر اور یوم القدس بھرپور انداز میں منانے کا مطالبہ

عوامی امنگوں کو سامنے رکھتے ہوئے اجلاس میں شامل رہنماؤں نے حکومت اور موجودہ چیف الیکشن کمشنر کے مستعفی ہونے اور ملک میں آزادانہ اور غیر جانبدارانہ الیکشن کمیشن کے تحت نئے شفاف انتخابات پر اتفاق کیا۔ سیاسی اور معاشی عدم استحکام، سماجی ابتری اور دہشت گردی جیسے سنگین مسائل سے نکلنے کا واحد راستہ نئے انتخابات کو قرار دیا گیا۔

اپوزیشن رہنماؤں نے یہ مطالبہ بھی رکھا کہ ملک میں جبر و فسطائیت کا خاتمہ کیا جائے اور سیاسی قیدیوں کی فوری رہائی ممکن بنائی جائے۔ قائدین نے پیکا ایکٹ کی بھرپور مذمت کی اور اسے واپس لینے کا مطالبہ کیا۔ اس کے ساتھ بلوچستان اور خیبر پختونخوا میں جاری دہشت گردی کے مسئلے پر بھی طویل بحث ہوئی اور اس پر شدید تشویش کا اظہار کیا گیا۔

اجلاس میں ایک ذیلی کمیٹی بھی تشکیل دی گئی جو اس ضمن میں اپنا لائحہ عمل طے کرے گی اور اپنی قیادت سے مشاورت کے بعد اسے مکمل اور جامع شکل دے گی۔