اسرائیل کی رکنیت اقوام متحدہ منسوخ کی جائے، وزیراعظم شہباز شریف کا مطالبہ
وزیر اعظم شہباز شریف نے غزہ میں معصوم شہریوں کے خلاف اسرائیلی حکومت کے جاری مظالم اور خطے میں جاری فوجی مہم جوئی کا حوالہ دیتے ہوئے اسرائیل کو اقوام متحدہ سے نکال باہر کرنے کا مطالبہ کر دیا
شیعیت نیوز : سعودی عرب کی میزبانی میں منعقدہ اسلامی سربراہی اجلاس سے خطاب کے دوران وزیر اعظم شہباز شریف نے غزہ میں اسرائیلی حکومت کے مظالم کی شدید مذمت کی۔
ان کا کہنا تھا کہ اسرائیل کے جنگی جرائم کے خلاف بین الاقوامی عدالت کے فیصلے کے باوجود یہ حکومت بین الاقوامی قوانین اور اقدار کی خلاف ورزی جاری رکھے ہوئے ہے۔
اسرائیلی حکومت نے تمام اخلاقی اور انسانی حدود کو نظر انداز کرتے ہوئے ہزاروں بے گناہ لوگوں کو شہید جب کہ لاکھوں کو بے گھر کر دیا ہے۔
اسرائیل کی جانب سے اس کے غیر انسانی اقدامات اور غیر قانونی سرگرمیوں کو روکنے کے بین الاقوامی مطالبات کو نظر انداز کرنے پر اس کی اقوام متحدہ کی رکنیت منسوخ کرنے کی ضرورت ہے۔
یہ بھی پڑھیں : نیتن یاہو حکومت غزہ میں نسل کشی پر صیہونی پارلیمنٹ رکن نے انتہا پسند قرار دے دیا
وزیر اعظم شہباز شریف نے غزہ میں شدید انسانی بحران کی طرف اشارہ کرتے ہوئے اسے کسی بھی قابل تصور پیمانے سے باہر قرار دیا۔
انہوں نے اسرائیل کے خلاف فوری طور پر ہتھیاروں کی پابندی کا مطالبہ کرتے ہوئے عالمی برادری پر زور دیا کہ وہ بین الاقوامی عدالتوں کے ذریعے اسرائیل کو اس کے جاری جنگی جرائم پر جوابدہ ٹھہرائے۔
شہباز شریف نے کہا کہ جہاں اسرائیلی حکومت جنگ زدہ علاقوں میں انسانی امداد کی ترسیل پر پابندی کو غزہ کے عوام پر دباؤ ڈالنے کے لیے استعمال کر رہی ہے، وہیں ہمیں (اسلامی ممالک) کو غزہ تک طبی اور غذائی امداد پہنچانے کا راستہ تلاش کرنا چاہئے۔
