امریکا پاکستان کا دوست نہیں ہر موقع پر تباہی پھیلانے کی تلاش میں ہوتا ہے، لیاقت بلوچ

شیعیت نیوز : نائب امیر جماعت اسلامی و سیکرٹری جنرل ملی یکجہتی کونسل لیاقت بلوچ نے اسلام آباد میں سابق وزرائے اعظم سید یوسف رضا گیلانی، راجہ پرویز اشرف اور انوار الحق کاکڑ اور دیگر رہنماوں سے ملاقات کی۔

صحافیوں سے گفتگو کرتے ہوئے کہا ہے کہ سیاسی قیادت ضد، انا اور مفادات کو ترک کرتے ہوئے سیاسی بحران کا سیاسی حل نکالے۔

آئینی ترامیم آئینی نہیں، حکومتی آئینی ترمیم جمہوریت اور عدلیہ کے بنیادی حقوق سے کھلواڑ ہے، 26 ویں آئینی ترمیم آئین کی روح کے خلاف ہے۔

حکومت اسٹیبلشمنٹ کی خواہشات کا غلام بن کر آنکھیں بند کر کے آئین، عدلیہ اور انسانی بنیادی حقوق سے خوفناک کھلواڑ کر رہی ہے جو خود ان کے لیے شکنجہ بنے گا۔

ترمیم متنازع اور بدنیتی پر مبنی تھی، آئین میں ترمیم کے لیے دو تہائی اکثریت کا استعمال بڑا بھونڈا اور شرمناک تھا۔

یہ بھی پڑھیں : پاراچنار کے لوگوں کو حب الوطنی کی سزا دی جا رہی ہے، مرکزی صدر آئی ایس او

26 ترامیم پر عمل درآمد کے لیے 27 ویں آئینی ترمیم، قانون سازی کا نیا بدنیتی ڈرامہ رچانے کی تیار ہو رہی ہے۔

حکومت عوام کے بنیادی مسائل اور سیاسی بحران حل کرنے کی بجائے نئے بحرانوں کو جنم دے رہی ہے۔

معاشی استحکام کے لیے امن، جان، مال اور عزت کی حفاظت کا احساس ناگزیر ہے۔

سیاسی عدم استحکام اور غیرآئینی اقدامات، ریاستی طاقت سے حالات کنٹرول کرنا پائیدار حل نہیں۔

قومی سیاسی بالغ نظری کا ثبوت دینا ہوگا وگرنہ ملک و ملت مزید مشکلات میں گھرتا جائے گا۔

پہلے بھی مارشل لا ادوار میں تباہی آئی اور اب بھی فوجی بالادستی علاج نہیں زہرقاتل ہی ثابت ہو گی۔

سیاسی آزادی کے لیے امریکا سے توقعات باندھنا بڑا دھوکا ہے۔

امریکا، اسرائیل، بھارت پاکستان کے دوست نہیں ہر موقع پر تباہی پھیلانے کی تلاش میں ہوتے ہیں۔