ڈی ایس پی علی رضا کے قاتل سپاہ صحابہ کے 2 دہشتگرد سی ٹی ڈی نے ہلاک کردئیے

شیعیت نیوز : کراچی کے علاقے شیر شاہ میں سی ٹی ڈی کی کارروائی میں ڈی ایس پی علی رضا کے قتل میں ملوث 2 دہشتگرد ہلاک ہوگئے ہیں۔

شیر شاہ پل کے قریب سی ٹی ڈی کے مبینہ مقابلے میں دو دہشت گرد مارے گئے جن کی لاشیں سول اسپتال منتقل کی گئیں۔

ہلاک ہونے والے ملزمان کی شناخت 30 سالہ عثمان قریشی ولد ایوب قریشی اور 35 سالہ حافظ قاسم رشید ولد عبدالرشید ہزاروی کے نام سے کی گئی ہے۔

انچارج سی ٹی ڈی راجہ عمر خطاب کے مطابق پولیس مقابلے میں دونوں دہشت گرد مارے گئے ہلاک دہشت گردوں سے بارودی مواد ، دو پستول ، بال بیرنگ اور خودکش جیکٹ میں استعمال ہونے والا سامان برآمد ہوا ہے۔

یہ بھی پڑھیں : سی ٹی ڈی پنجاب نے لشکر جھنگوی اور داعش کے 18 دہشت گردوں کو گرفتار کر لیا

ڈی آئی جی سی ٹی ڈی آصف اعجاز شیخ نے بتایا کہ ہلاک ملزمان کا تعلق دہشتگرد گروہ سپاہ صحابہ سے تھا جو اب تحریک طالبان میں شامل ہوئے تھے۔

سی ٹی ڈی کے ہاتھوں مارے جانے والے دہشت گرد ڈی ایس پی علی رضا کے قتل میں ملوث ہونے کے علاوہ 35 سے زائد مقدمات میں ملوث تھے اور پولیس کو انتہائی مطلوب تھے۔

ہلاک دہشتگردوں سے ٹارگٹڈ لسٹ بھی ملی ہے جو شہر میں مزید تخریب کاری کی منصوبہ بندی کر رہے تھے۔