یہودی وزیر کا بیان عالمی امن سے کھیلنے کے مترادف ہے، طاہر اشرفی

شیعیت نیوز : پاکستان علماء کونسل کے مرکزی چیئرمین حافظ طاہر اشرفی نے اسرائیلی وزیر اتمار بِن گویر کی طرف سے مسجد اقصیٰ میں یہودیوں کی عبادت گاہ بنانے کے بیان کی سخت مذمت کرتے ہوئے کہا ہے کہ یہودی وزیر کا بیان پورے عالم اسلام اور امن چاہنے والوں کے لیے لمحۂ فکریہ ہے۔ اس حوالے سے فوری طور پر اسلامی تعاون تنظیم اور اقوام متحدہ کو اپنا کردار ادا کرنا چاہیے۔ یہودی وزیر کا بیان مشرق وسطیٰ اور عالمی امن سے کھیلنے کے مترادف ہے اور اس طرح کے انتہاپسندانہ اور اشتعال انگیز بیانات عالمی سطح پر دہشتگردی کے مترادف ہیں۔

یہ بھی پڑھیں : غزہ میں وحشتناک ترین نسل کشی

انہوں نے کہا کہ مسجد اقصیٰ کی تاریخی، اسلامی اور قانونی حیثیت ہے اور اسے ختم کرنے کی کوئی بھی سازش دنیا کے امن کو تباہ کرنے کے مترادف ہو گی۔ عالمی دنیا اپنی ذمہ داریاں پوری کرے اور اسرائیلی مظالم کو ختم کروانے اور ایک آزاد و خودمختار فلسطینی ریاست کے قیام کے لیے اپنا کردار ادا کرے۔ طاہر اشرفی نے کہا کہ عالمی برادری کو اسرائیلی وزیر کے اس بیان کو سنجیدگی سے لینا چاہیے اور اسرائیل کی سفاکیت اور بربریت کے خاتمے کے لیے اپنا کردار ادا کرنا چاہیے۔