آرمی چیف نے دورہ امریکہ میں کشمیر اور فلسطین پر موثر نمائندگی کی ہے، سردار عتیق

شیعیت نیوز:  سابق وزیراعظم آزاد کشمیر اور مسلم کانفرنس کے صدر سردار عتیق احمد خان نے حالیہ دورہ امریکہ کے دوران تنازعہ کشمیر اور فلسطین کاز کو اجاگر کرنے پر بری فوج کے سربراہ جنرل سید عاصم منیر کو سراہا ہے۔

ذرائع کے مطابق سردار عتیق نے آرمی چیف جنرل عاصم منیر کے نام مبارکبادی کے ایک پیغام میں کہا کہ جموں و کشمیر کے لوگ پیچیدہ بین الاقوامی تاریخ کے اس نازک مرحلے پر کشمیر اور فلسطین کاز کو جرات مندانہ طریقے سے پیش کرنے پر آرمی چیف کا شکریہ ادا کرتے ہیں۔

یہ بھی پڑھیں :یمن کی طاقت نے اسرائیل کی نیند حرام کر دی

انہوں نے کہا کہ ایٹمی ملک پاکستان کے آرمی چیف کی طرف سے اس وقت تنازعہ کشمیر پر اصولی موقف پیش کرنا اور مسئلہ فلسطین کو اجاگر کرنا ان مسائل پر کئی سفارتی اقدامات سے زیادہ اہم ہے۔

سردار عتیق نے اپنے پیغام میں کہا کہ کشمیر اور فلسطین کی جدوجہد کی اس کثیرالجہتی پروجیکشن سے کشمیریوں میں تازہ حوصلہ اور اعتماد پیدا ہوا ہے۔

یاد رہے کہ 1948ء سے اقوام متحدہ کے ایجنڈے پر موجود کشمیر اور فلسطین دونوں تنازعات کا تعلق حق خودارادیت کی بحالی سے ہے۔