لبنان، عراق اور یمن کے مقاومتی جوانوں کا شکریہ ادا کرتے ہیں، ترجمان القسام بریگیڈز

شیعیت نیوز: ترجمان القسام بریگیڈز ابوعبیدہ نے امریکہ اور صہیونی حکومت کے خلاف کاروائیاں کرنے پر عراق، لبنان اور یمن کی مقاومتی تنظیموں کا شکریہ ادا کرتے ہوئے کہا ہے کہ طوفان الاقصی کے بعد سے اب تک 335 صہیونی بکتربند گاڑیوں کو تباہ کیا گیا ہے۔

رپورٹ کے مطابق، حماس کی ذیلی شاخ القسام بریگیڈز کے ترجمان ابوعبیدہ نے ایک بیان میں کہا ہے کہ طوفان الاقصی شروع ہونے کے بعد سے 48 دن گزرے ہیں اور فسلطینی جوان دشمن صہیونیوں کے خلاف مزاحمت جاری رکھے ہوئے ہیں۔

انہوں نے کہا کہ غزہ پر صہیونی جارحیت کے بعد سے اب تک دشمن کو شدید نقصان پہنچاتے ہوئے 335 بکترگاڑیاں مجموعی طور پر تباہ کردی گئی ہیں۔ گذشتہ 72 گھنٹوں کے دوران مجاہدین نے کاروائیاں بڑھاتے ہوئے 33 گاڑیاں تباہ کردی ہیں۔

یہ بھی پڑھیں : مقاومت نے اپنی شرائط پر صہیونی حکومت کو جنگ بندی پر مجبور کیا، اسماعیل ہنیہ

گذشتہ روز التوام کے علاقے میں اسرائیلی فوجی گاڑی سے اسلحہ بردار اہلکار اتر گئے تو موقع پر گھات لگائے ہوئے مجاہدین نے حملہ کیا اور پانچ صہیونی فوجیوں کو موت کے گھاٹ اتار دیا جبکہ بیت حانون میں دشمن کے فوجیوں بموں سے حملہ کیا گیا۔

ترجمان القسام بریگیڈز نے کہا کہ رنتیسی ہسپتال کے مشرقی علاقے محلہ شیخ رضوان میں القسام کے جوانوں نے گشت کرنے والے صہیونی اہلکاروں پر حملہ کردیا جس سے 8 صہیونی فوجی ہلاک یا زخمی ہوگئے۔

ابوعبیدہ نے کہا کہ دشمن کو غزہ پر جارحیت کے بعد سویلین کو قتل کرنے کے علاوہ کوئی کامیابی نہیں ملی ہے۔ اگر دشمن جنگ جاری رکھنا چاہتا ہے تو ہم بھی ہر حالت کا سامنا کرنے کے لئے تیار ہیں۔ عارضی جنگ بندی کی شروع سے ہم نے تجویز دی تھی جبکہ دشمن طاقت کے زور پر اپنے اہداف حاصل کرنا چاہتے تھے۔

ترجمان نے مزید کہا کہ غرب اردن کے فلسطینی عوام کو سلام کرتا ہوں جنہوں نے غزہ کے بے گناہ عوام کی حمایت کی۔

انہوں نے کہا کہ یمن، عراق اور لبنان میں سرگرم مقاومتی تنظیموں کا شکریہ ادا کرتے ہیں جنہوں نے دشمن کی تنصیبات کو نشانہ بنایا۔