علاقے میں جنگ پھیلنے کی ذمہ داری امریکہ اور صیہونی حکومت پر ہوگی، امیر عبداللہیان

شیعیت نیوز: ایران کے وزیر خارجہ حسین امیر عبداللہیان نے ایک بار پھر کہا ہے کہ اگر جنگ فوری طور پر نہ روکی گئی تو ہر لمحہ پورے علاقے میں پھیل سکتی ہے اور اس کی ذمہ داری امریکہ اور صیہونی حکومت پر ہوگی ۔

ارنا کے نامہ نگار کی رپورٹ کے مطابق وزیر خارجہ حسین امیر عبداللہیان نے انقرہ میں ترکی کے صدر رجب طیب اردوغان سے ملاقات میں کہا ہے کہ امریکہ ایسی حالت میں دوسروں سے تحمل کا مطالبہ کرتا ہے کہ غزہ کے مظلوم عوام کے خلاف صیہونی حکومت کے وحشیانہ جرائم میں بنیادی کردار ادا کررہا ہے اورامریکی سینٹرل کمان کا چیف اور دیگر امریکی فوجی کمانڈر تل ابیب کے وار روم میں موجود ہیں۔

انھوں نے کہا کہ امریکہ جنگ کا ایک فریق ہے اس لئے وہ دوسروں کو تحمل کی نصیحت نہیں کرسکتا۔

حسین امیر عبداللہیان نے کہا کہ علاقے کے استقامتی گروہ آزادانہ فیصلہ کرتے ہیں اور غزہ کے نہتے عوام کے خلاف جنگ نہ روکی گئی تو ہر آن اس کے پھیلنے کا خطرہ موجودہ ہے اور اس کی پوری ذمہ داری امریکہ اور صیہونی حکومت پر ہوگی۔

یہ بھی پڑھیں : آج فلسطین کے حالات مسلمین اور دنیا کے سبھی عوام کے لئے اذیت ناک ہیں، صدر رئیسی

انھوں نے کہا کہ فلسطینی استقامتی گروہوں نے انہیں بتایا ہے کہ فوجی توانائی اور وسائل کے لحاظ سے صیہونی حکومت سے طولانی جنگ اور بالادستی کے ساتھ مقابلہ جاری رکھنے میں انہیں کوئی مشکل نہیں ہے لیکن اس بات کے پیش نظر کہ صیہونی حکومت کے حملے غزہ کے نہتے اور محصور شہریوں پر مرکوز ہیں، ضروری ہے کہ اسلامی ممالک صیہونی حکومت کے وحشیانہ جنگی جرائم رکوانے، غزہ کا محاصرہ ختم کرانے اور انسان دوستانہ امداد پہنچانے کے لئے فوری طور پر ضروری اقدامات انجام دیں۔

انھوں نے کہا کہ ایران اس سلسلے میں عرب اوراسلامی ملکوں کے سربراہوں کا اجلاس ضروری سمجھتا ہے۔

ترکی کے صدر رجب طیب اردوغان نے بھی اس ملاقات میں غزہ کے بارے میں صدر ایران سید ابراہیم رئیسی کے ساتھ اپنی ٹیلیفونی گفتگو کا ذکر کرتے ہوئے کہا کہ ترکی کی پہلی ترجیح غزہ پر حملوں کی بندش، جنگ بندی اور محاصرے کے خاتمہ نیز انسانی دوستانہ امداد کی ترسیل ہے ۔

انھوں نے کہا کہ ہمیں فلسطینی عوام کو سلامتی اور تحفظ فراہم کرنے کے لئے تمام ضروری اقدامات انجام دینے کی ضرورت ہے۔

اس ملاقات میں باہمی روابط کے فروغ پر بھی گفتگو ہوئی ۔