جنوبی لبنان، حزب اللہ کی صہیونی فوج کے ساتھ جھڑپوں میں تیزی، 120 اسرائیلی ہلاک اور زخمی

شیعیت نیوز: لبنانی تنظیم حزب اللہ نے جنوبی لبنان کے مختلف مقامات پر صہیونی فوج کے ساتھ جھڑپوں کے دوران دشمن کے 120 سپاہیوں کے ہلاک یا زخمی ہونے کا دعویٰ کیا ہے۔

فلسطینی ذرائع ابلاغ نے کہا ہے کہ لبنانی مقاومتی تنظیم حزب اللہ نے ایک بیان میں کہا ہے کہ جنوبی لبنان کے مختلف علاقوں میں غاصب صہیونی فوج کے ساتھ جھڑپوں میں تیزی آگئی ہے۔ تازہ ترین واقعات میں دشمن کو شدید نقصان ہوا ہے۔

تفصیلات کے مطابق جھڑپوں کے دوران صہیونی فوج کے 120 اہلکار ہلاک یا زخمی جبکہ 9 ٹینک میزائل لگنے سے تباہ ہوگئے ہیں جبکہ ایک ڈرون طیارہ بھی منہدم ہونے کی خبر دی گئی ہے۔

حزب اللہ کے مطابق اس کے جوانوں نے سرحدی علاقے میں صہیونی فوجیوں کے بارے میں مکمل معلومات لینے کے بعد الخزان کے علاقوں میں کمین گاہوں پر حملے کئے ہیں۔

بیان میں کہا گیا ہے کہ شہید حسین منصور یونٹ نے گائیڈڈ میزائلوں کے ذریعے فوجی مقامات کو نشانہ بنایا ہے جس کے نتیجے میں کمین گاہ میں موجود تمام صہیونی فوجی ہلاک یا زخمی ہوگئے ہیں۔

یہ بھی پڑھیں : یمن کی دھمکی کے بعد صہیونی قصبے ایلات پر دوبارہ میزائل حملے

صہیونی فوج نے بھی جنوبی لبنان کے قصبوں مرکبا اور وادی العلیق کے مختلف مقامات پر توپخانے سے گولہ باری کی ہے۔

اس سے پہلے صہیونی فوجی ترجمان نے اعتراف کیا تھا کہ غزہ کے شمالی علاقے میں فلسطینی مزاحمتی گروہوں کے ساتھ جھڑپوں کے دوران گفعانی یونٹ کے دو افسر ہلاک اور مزید دو زخمی ہوگئے ہیں۔

دوسری جانب خبری ذرائع نے الجلیل اور مقبوضہ فلسطین کے شمالی علاقے میں واقع بعض صیہونی بستیوں میں خطرے کے سائرن بجنے کی خبر دی ہے۔

قدس ٹی وی چینل کی رپورٹ کے مطابق جنوبی لبنان سے راکٹوں سے حملہ کئے جانے کے بعد شمالی فلسطین میں چند خوفناک دھماکوں کی آوازیں سنائی دیں۔

صیہونی حکومت کے چینل بارہ نے بھی خبر دی ہے کہ لبنان سے چار راکٹ فائر کئے گئے جن میں سے دو راکٹوں کو ٹریک نہیں کیا جاسکا۔