نائیجر کی فوجی کونسل نے فرانسیسی سفارت خانے کا پانی اور بجلی کاٹ دی، بین الاقوامی ذرائع

شیعیت نیوز: نائیجر کی حکمران فوجی کونسل نے نیامی میں فرانسیسی سفارت خانے کا پانی اور بجلی منقطع کر دی اور خبردار کیا کہ جو بھی فرانسیسیوں کو سامان اور خوراک فراہم کرتا ہے وہ نائیجر کی آزاد قوم کا دشمن ہے۔

رپورٹ کے مطابق نائیجر کی حکمران نئی فوجی کونسل نے فرانسیسی سفیر کو ملک چھوڑنے کے لیے 48 گھنٹے کی مہلت دینے کے بعد نائیجر کے دارالحکومت نیامی میں فرانسیسی سفارت خانے کی پانی اور بجلی کی سپلائی منقطع کردی اور کسی بھی کھانے اور سامان کی فرانسیسی سفارت خانے کو سپلائی پر پابندی عائد کر دی گئی۔

یہ بھی پڑھیں : ہالینڈ میں قرآن کو جلانے کے خلاف مسلمانوں کے مظاہرے

اناطولیہ خبررساں ایجنسی نے مقامی ذرائع کے حوالے سے بتایا ہے کہ نائیجر میں نئے فوجی حکمرانوں نے زینڈر شہر میں فرانسیسی قونصل خانے کا پانی اور بجلی بھی منقطع کر دی۔ اطلاعات کے مطابق قومی کونسل برائے تحفظ وطن کی قومی امدادی کمیٹی کے سربراہ ایلی عیسیٰ حسومی بوریما نے تمام فریقین اور شراکت داروں سے کہا ہے کہ وہ فرانسیسی اڈوں پر کھانے پینے کی اشیاء، پانی اور بجلی کی فراہمی معطل کر دیں۔

نائیجر میں بوریما نے یہ دھمکی بھی دی کہ کوئی بھی فریق جو نائیجر میں فرانسیسیوں کو سامان اور خدمات فراہم کرنے کے عمل میں مدد کرے گا اسے ’’آزاد قوم کا دشمن‘‘ تصور کیا جائے گا۔

ہفتے کے روز فرانسیسی وزارتِ خارجہ نے نائیجر سے اپنے سفیر کی واپسی کے لیے نائیجر کی فوجی کونسل کی ڈیڈ لائن کے جواب میں اعلان کیا کہ نائیجر بغاوت کے منصوبہ سازوں کو اس ملک سے فرانسیسی سفیر کو نکالنے کا اختیار نہیں ہے۔

فرانس کی وزارت خارجہ نے ملک کی سرکاری خبر رساں ایجنسی کو ایک بیان بھیجا اور اعلان کیا: فرانس کو بغاوت کے منصوبہ سازوں (نائیجر سے فرانسیسی سفیر کو واپس بلانے کی) درخواست کے بارے میں مطلع کر دیا گیا ہے، لیکن بغاوت کے منصوبہ سازوں کے پاس یہ درخواست پیش کرنے کی صلاحیت نہیں ہے۔ سفیر کی تصدیق نائجیریا کے مجاز اور جائز حکام سے ہونی چاہیے۔