فلسطینیوں کے خلاف صہیونی جارحیت ختم کی جائے، شاہ عبداللہ

شیعیت نیوز: اردن کے بادشاہ شاہ عبداللہ دوم نے کہا کہ صہیونی حکومت کے جارحانہ اقدامات اور بہیمانہ کاروائیوں کی وجہ سے خطے کی سیکورٹی خطرے میں پڑ گئی ہے۔

اسپوٹنک نے خبر دی ہے کہ اردن کے بادشاہ شاہ عبداللہ دوم نے امریکی معاون وزیرخارجہ باربرا لیو سے ملاقات کے دوران صہیونی حکومت کی جانب سے فلسطین کے نہتے عوام کے خلاف کاروائیوں کی مذمت کرتے ہوئے امریکہ سے صہیونی حکومت کو لگام دینے کا مطالبہ کیا ہے۔

یہ بھی پڑھیں : سوئیڈن میں قرآن سوزی ، انصاراللہ یمن کا شدید ردعمل

انہوں نے کہا کہ فلسطین میں امن کے قیام کے لئے 1967 کی سرحدوں کے مطابق دو ریاستوں کی تشکیل اور بیت المقدس کو فلسطین کا دارالخلافہ بنانے کی ضرورت ہے۔

شاہ عبداللہ نے مقبوضہ علاقوں میں کشیدگی میں کمی کی کوششوں پر زور دیا اور کہا کہ صہیونی شدت پسندوں کی جانب سے نہتے فلسطینیوں کے گھروں اور املاک کو نقصان پہنچانے سے حالات مزید نازک رخ اختیار کریں گے۔

یاد رہے کہ گذشتہ ایام میں صہیونیوں دہشت گردوں نے مغربی کنارے میں حملہ کرکے فلسطینیوں کے گھروں کو مسمار اور املاک کو نقصان پہنچایا تھا۔

یہ بھی پڑھیں : سوئیڈن میں قرآن پاک جلائےجانے کےخلاف ایم ڈبلیو ایم کا کراچی میں احتجاج کا اعلان

فلسطینیوں کے خلاف صہیونی دہشت گردی کے خلاف اردن کے دارالحکومت امان میں عوام نے مظاہرہ کیا تھا۔ تحریک اسلامی اردن کے زیراہتمام اس ریلی میں شرکاء نے صہیونی حکومت کے اقدامات کی مذمت کی اور فلسطینیوں کی حمایت میں نعرے لگائے۔

شرکاء نے حکومت سے اپیل کی کہ فلسطینیوں کے خلاف کاروائی پر صہیونی حکومت کے ساتھ ہونے والے تمام معاہدے منسوخ کئے جائیں۔