سعودی وزیر خارجہ شاہ سلمان کا اہم پیغام لے کر تہران کا دورہ کریں گے

شیعیت نیوز: سعودی عرب کے وزیر خارجہ شہزادہ فیصل بن فرحان سعودی عرب کے فرمان روا سلمان بن عبدالعزیز کا اہم پیغام لے کر تہران آرہے ہیں۔

الیوم نے خبر دی ہے کہ سعودی عرب کے وزیرخارجہ فیصل بن فرحان آئندہ ہفتے ایران کے دورے پر آئیں گے۔ سعودی وزیر خارجہ تہران کے اعلی حکام تک شاہ سلمان کا اہم پیغام پہنچائیں گے۔

رائ الیوم نے باخبر سیاسی ذرائع کے حوالے سے کہا ہے کہ سعودی شہزادہ فیصل بن فرحان آل سعود ایرانی صدر آیت اللہ ابراہیم رئیسی کو سعودی عرب کے بادشاہ سلمان بن عبدالعزیز کا اہم پیغام پہنچائیں گے۔ اطلاعات کے مطابق یہ پیغام دونوں ممالک کے روابط کے بارے میں ہے۔

دورے کے دوران سعودی وزیرخارجہ ایرانی صدر اور دوسرے اعلی حکام سے ملاقات کریں گے۔ اس سے پہلے برکس کے وزارائے خارجہ کے اجلاس کے دوران شہزادہ فیصل نے اعلان کیا تھا کہ کیپ ٹاون میں ایرانی ہم منصب سے ملاقات کریں گے۔

یہ بھی پڑھیں : رہبر انقلاب کی دور اندیشی کا دشمن بھی معترف ہے، خطیب آیت اللہ احمد خاتمی

دراین اثناء سعودی وزارت خارجہ نے ٹویٹر پر کہا ہے کہ دونوں وزرائے خارجہ نے بیجنگ معاہدے کے تحت باہمی تعلقات کو مزید مستحکم کرنے اور بین الاقوامی سطح پر امن اور سیکورٹی کے حوالے سے ایک دوسرے سے تعاون کریں گے۔

سعودی وزیر خارجہ نے دونوں ممالک کے مفادات کو ملحوظ خاطر رکھتے ہوئے مستقبل میں مختلف شعبوں میں اعلی حکام کے درمیان ملاقاتوں کا سلسلہ جاری رکھنے کی ضرورت پر زور دیا تھا۔

اس موقع پر ایرانی وزیر خارجہ نے دونوں ملکوں کے تعلقات میں ہونے والی پیشرفت پر اطمینان کا اظہار کیا اور کہا دونوں ممالک نے بیک وقت سفیروں کی تعییناتی کے ساتھ ساتھ سفارت خانے کھولنے کا اعلان کرکے اچھا قدم اٹھایا ہے۔

سعودی وزیر خارجہ نے کہا کہ ایران کی طرف سے دعوت کے بعد جلد تہران کا دورہ کریں گے۔

ملاقات کے دوران دونوں رہنماؤں نے ایران اور سعودی عرب کے سربراہان مملکت کے لئے خیر سگالی کے پیغامات بھیجے۔