تمام یمنی فریق لڑائی کے خاتمے اور امن قائم کرنے کے لیے سنجیدہ ہیں، سعودی عرب

شیعیت نیوز: یمن میں سعودی عرب کے سفیر نے کہا ہے کہ تمام یمنی فریق جنگ کے خاتمے کے لیے سنجیدہ ہیں۔

غیرملکی خبررساں ادارے کے مطابق یمن میں سعودی سفیر محمد آل جابر نے ایک بیان میں کہا کہ تمام یمنی فریق لڑائی کے خاتمے اور امن قائم کرنے کے لیے سنجیدہ ہیں۔

انہوں نے ساتھ ہی یہ بھی واضح کیا کہ یہ پیش گوئی کرنا ناممکن ہے کہ براہ راست مذاکرات کب ہوں گے، کیونکہ حکومت اور حوثی فی الحال ایک ساتھ بیٹھنے سے گریزاں ہیں، اس لیے یہ کہنا ناممکن ہے کہ یمن میں جنگ کے اصل فریق مذاکرات پر کب راضی ہوتے ہیں۔

گذشتہ ماہ صنعا میں حوثی حکام کے ساتھ ملاقات کے بعد اپنے پہلے بیانات میں انہوں نے کہا کہ ہر کوئی سنجیدہ ہے، مطلب یہ ہے کہ ہر کوئی امن کی تلاش میں ہے۔

انہوں نے مزید کہا کچھ بھی واضح نہیں ہے، لیکن میں پر امید ہوں اور ہم امید کرتے ہیں کہ انشا اللہ، یمنی جلد از جلد کوئی راستہ نکال لیں گے۔

یہ بھی پڑھیں : مجاہد کمانڈر ایاد الحسنی کی شہادت اسرائیل کا گھناؤنا جرم ہے، القسام بریگیڈ

دوسری جانب ایران اور سعودی عرب کے وزرائے خارجہ نے ٹیلی فونی گفتگو کرتے ہوئے دونوں ممالک کے تعلقات کا جائزہ لیا۔

ایران پریس کی رپورٹ کے مطابق ایران کے وزیر خارجہ امیرعبداللہیان نے سعودی عرب کے وزیر خارجہ فیصل بن فرحان سے ہونے والی ٹیلی فونی گفتگو میں دونوں ممالک کے مابین تعلقات کی برقراری اور دونوں ملکوں کے وزرائے خارجہ کے اجلاس کے انعقاد پر خوشی کا اظہار کرتے ہوئے دونوں ملکوں کے مابین تیکنیکی ماہرین کے دوروں اور سفارت خانوں اور قونصل خانے کھولے جانے اور سفیروں کی تقرری پر کہا کہ ایران نے سرکاری طور پر سعودی عرب میں اپنا سفارت خانہ اور قونصل خانہ کھولنے کیلئے ضروری اقدامات کئے ہیں۔

ایران کے وزیر خارجہ نے دونوں ممالک کے حکام اور وزرائے خارجہ کے ایک دوسرے کے دارالحکومتوں کے دوروں کو مشترکہ تعاون اور مناسب تعلقات کا مظہر قرار دیا۔

سعودی عرب کے وزیر خارجہ نے دونوں ممالک کے درمیان تعلقات کے مستقبل اور دونوں ممالک کے درمیان تعلقات کو فروغ دینے اور مضبوط بنانے کی کوششوں کے بارے میں ریاض کے مثبت نقطہ نظر پر زور دیتے ہوئے کہا کہ ہم نے گزشتہ دو ماہ کے دوران اچھے اقدامات کیے ہیں اور طے پانے والے معاہدوں کی پاسداری ظاہر کرتی ہے کہ ہم اس بارے میں سنجیدہ ہیں۔

انہوں نے کہا کہ ہمیں امید ہے کہ دونوں ممالک کے سفیروں کی تقرری سے دونوں ممالک کے درمیان تعاون مزید فروغ پائے گا۔