ایران ہمیشہ کی طرح یمنی عوام کے حقوق کی حمایت کرتا ہے، آیت اللہ رئیسی

شیعیت نیوز: آیت اللہ رئیسی نے کہا کہ یمنی قیدیوں کی رہائی کی وجہ یمنی عوام کی استقامت ہے۔ سیاسی مذاکرات کے ذریعے ہی یمن میں جاری بحران ختم کیا جاسکتا ہے۔

رپورٹ کے مطابق ایران کے صدر آیت اللہ رئیسی نے یمن کی اعلی سیاسی کونسل کے سربراہ مہدی المشاط سے ٹیلیفون پر رابطہ کیا اور عید فطر کے موقع پر یمنی عوام کو مبارک باد پیش کرتے ہوئے کہا کہ قیدیوں کی رہائی یمنی عوام کی استقامت کا نتیجہ ہے۔ یمن میں جاری بحران پریشان کن ہے۔ مذاکرات ہی قیدیوں کی آزادی، محاصرے کے خاتمے اور وسیع جنگ بندی کا ذریعہ ہیں۔

انہوں نے یمنی عوام کے لئے حمایت کا اعادہ کرتے ہوئے کہا کہ یمن کے مستقبل کا فیصلہ یمنی عوام کے پاس ہونا چاہئے۔ یمن میں امن و امان کی بحالی کے ساتھ دونوں ممالک کے تعلقات میں مزید بہتری آئے گی۔

اس موقع پر یمنی اعلی سیاسی کونسل کے سربراہ نے یمنی عوام کی حمایت پر ایران کا شکریہ ادا کیا اور رہبر معظم انقلاب اسلامی کی خدمت سلام عرض کرتے ہوئے امت مسلمہ کے لئے نیک تمناؤں کا اظہار کیا۔

انہوں نے موجودہ ایرانی حکومت کو مختصر عرصے میں حاصل ہونے والی کامیابیوں پر خوشی کا اظہار کرتے ہوئے امید ظاہر کی کہ ایران یمن کے بحران کے خاتمے کے لئے فعال کردار ادا کرتا رہے گا۔

یہ بھی پڑھیں : یمن کے سعودی عرب پر انحصار کا دور ختم ہو چکا ہے، محمد طاہر انعم

دوسری جانب بادشاہ عمان نے اپنے ایک پیغام میں ایرانی صدر آیت اللہ سید ابراہیم رئیسی کو عید الفطر کی آمد پر مبارکباد پیش کی۔

بادشاہ عمان سلطان ہیثم بن طارق نے ایک پیغام میں ایرانی صدر کو عید الفطر کی آمد پر مبارکباد پیش کی۔

ترکمانستان کے صدر ‘ سردار بردی محمداف’، ازبک صدر ‘شوکت میرضیایف’نے بھی آج ایرانی صدر کو الگ الگ پیغامات میں مبارکباد پیش کی۔

حالیہ دنوں میں ہندوستان کے وزیر اعظم، آذربائیجان کے صدر، کویت کے امیر، قازقستان کے صدر، تاجکستان کے صدر، ازبکستان کے صدر، متحدہ عرب امارات کے امیر اور نائب نے عید کی آمد پر الگ الگ پیغامات میں صدر مملکت کو عید الفطر کی مبارکباد دی ہے۔