ماہ ِ عظیم رمضان خدا کا اپنے بندوں کے لیے ایسا بیش قیمت تحفہ ہے کہ جو سال کے باقی ایام میں نہیں ملتا ،معصومہ نقوی

شیعیت نیوز: ماہ مبارک رمضان کی آمد کے موقع پر مرکزی صدر مجلس وحدت مسلمین شعبہ خواتین سیدہ معصومہ نقوی نے اپنے پیغام میں کہا کہ ماہ مبارک رمضان کی آمد پر تمام امت مسلمہ کو مبارکباد پیش کرتی ہوں یہ ماہ عظیم خدا کا اپنے بندوں کے لیے ایسا بیش قیمت تحفہ ہے کہ جو سال کے باقی ایام میں نہیں ملتا یہ مبارک مہینہ خیر و برکت ، جسم و روح کو پاک کرنے اور خداوند عالم سے قریب ہونے کا مہینہ ہے اس ماہ کی مبارک ساعتوں میں ہمارا سانس لینا بھی تسبیح شمار ہوتا ہے ۔

یہ بھی پڑھیں: امت مسلمہ کیلئے لازم ہے کہ وہ ماہِ رمضان میں بدی کو ترک کرےاور تزکیہ نفس کی جانب خصوصی توجہ دے،علامہ ساجدنقوی

ان کا کہنا تھا کہ ہمیں خدا کی خوشنودی کی خاطر روزہ رکھنا ، نماز و عبادات اور تلاوت قرآن مجید بجا لانے کے ساتھ ساتھ اپنی اخلاقی و روحانی اصلاح کی طرف بھی توجہ دینی چاہیے اور خصوصا اس ماہ مبارک کی رحمتوں اور برکتوں سے بھرپور لمحات میں اپنے قلوب کی پاکیزگی کے لیے استفادہ کرنا چاہیے کیونکہ یہ اس خوبصورت مہینے کا خاصہ ہے کہ انسانی قلوب احکام خداوندی کو قبول کرنے اور ان پر عمل پیرا ہونے کے لیے دیگر ایام کی نسبت ذیادہ آمادہ ہوتے ہیں۔

یہ بھی پڑھیں: کالعدم سپاہ صحابہ /لشکر جھنگوی نےایک ہی شیعہ خاندان کا 28واں فرد ٹارگٹ کلنگ میں شہید کردیا

انہوں نے کہا کہ خدا کی بندگی و عبادت کے ساتھ ساتھ خلق خدا کی خدمت اور محتاج و مساکین کی مدد کرنا بھی ہمارا دینی و اخلاقی فرض ہے اور جس کے بدلے خدا نے دنیا و آخرت میں اجر کثیر کا وعدہ کر رکھا ہے پروردگار عالم سے دعاگو ہیں کہ ہمیں ماہ مبارک رمضان میں صحت و عافیت کے ساتھ داخل ہونا نصیب فرمائے اور اس کے تمام تر فیوض و برکات کو سمیٹنے اور تزکیہ نفس کرنے کی توفیق عطا فرماے۔ آمین