یمن میں امریکی سفارت خانے کے سامنے احتجاجی اجتماع

شیعیت نیوز: سیکڑوں کی تعداد میں یمنی شہریوں نے صنعاء میں امریکی سفارت خانے کے سامنے احتجاجی اجتماع کر کے وسیع پیمانے پر مظاہرہ کیا۔

یمن کی سالویشن حکومت کے ایک سینیئر رکن خالد المدانی نے ایران پریس سے گفتگو میں صنعا میں امریکی سفارت خانے کے سامنے، کئے جانے والے احتجاجی اجتماع کے بارے میں کہا ہے کہ امریکی سفارت خانے کے آس پاس کے یمنی شہریوں نے سفارت خانے کے قریب سے گذرنے پر پابندی کے خلاف شدید احتجاج کیا۔

مظاہرین کا کہنا تھا کہ امریکی سفارت خانے کے اطراف میں بلاسبب اتنی سختی برتی گئی ہے کہ امریکی سفیر کو اس علاقے سے گذرنے کی اجازت ہے مگر یمنی شہریوں کو اجازت نہیں ہے۔

المدانی نے کہا کہ یمنی عوام عزت و وقار اور آزادی کے حامل ہیں اور وہ امریکی فوجیوں کے انخلا کا جشن منا رہے ہیں چونکہ امریکی فوجی بہت ہی رسوائی کے ساتھ صنعا چھوڑنے پر مجبور ہوئے تھے۔

یہ بھی پڑھیں : عالمی میڈیا میں انقلاب اسلامی ایران کی 44ویں سالگرہ کی کوریج

یمن کی سرگرم ثقافتی شخصیت ماجد الشریف نے بھی کہا کہ گیارہ فروری دو ہزار پندرہ کو امریکی فوجی، نہایت ذلت و رسوائی کے ساتھ صنعاء سے بھاگنے پر مجبور ہوئے۔

انھوں نے کہا کہ ہم امریکیوں کو بتانا چاہتے ہیں کہ ہم یمن کو تمہارے وجود سے پاک کئے بغیر کبھی چین سے نہیں بیٹھیں گے۔

واضح رہے کہ سعودی عرب نے امریکہ، متحدہ عرب امارات اور کئی دیگر ممالک کی حمایت سے مارچ دو ہزار پندرہ میں یمن پر فوجی جارحیت کا آغاز اس ملک کی زمینی، سمندری اور فضائی ناکہ بندی شروع کی تھی اور یہ سلسلہ آج بھی جاری ہے۔

یمن میں سعودی عرب اور اس کے اتحاد کے وحشیانہ حملوں میں اب تک کئی ہزار سے زیادہ یمنی شہری شہید اور دسیوں ہزار زخمی ہوئے ہیں جبکہ لاکھوں افراد کو اپنا گھر بار چھوڑنے پر مجبور ہونا پڑا ہے۔

سات سال سے زائد عرصے سے جاری اس جنگ میں ہزاروں لوگوں کو موت کی نیند سلانے اور اس ملک کے بنیادی ڈھانچے کو تباہ کرنے کے باوجود جارح سعودی اتحاد اپنا ایک بھی مقصد حاصل نہیں کرسکا ہے۔