شیعہ تنظیمات و اداروں کے زیر اہتمام سالانہ شہداء فیسٹیول کا انعقاد، خانوادہ شہداءکی خصوصی شرکت

شیعیت نیوز: (رپورٹ: ٹی ایچ شہزاد) حسب سابق امسال دوسرا سالانہ شہداء فیسٹیول اپنے شان و شوکت سے 22 جنوری 2023ء بروز اتوار فردوسیہ قبرستان فیروز پور روڈ، لاہور میں منعقد ہوا۔ قبرستان کی فضا معنوی و روحانی سرگرمیوں سے معطر تھی۔ جس میں مختلف سرگرمیوں کے ذریعے سے شہداء کو خراج عقیدت پیش کیا گیا اور عاشقان شہداء کو افکار و آثار شہداء سے آگاہ کیا گیا۔ اس موقع پر خیمہ قرآن کتاب نجات، خیمہ شہدائے ملت جعفریہ پاکستان، خیمہ کنیزان زہراء و طفلان مکتب، خیمہ شہدائے مدافعان وطن (افواج پاکستان و اے پی ایس) و جنت البقیع اور خیمہ مدافعان ولایت کا اہتمام کیا گیا۔ علاوہ ازیں بچوں کیلئے موثر سرگرمیوں کیلئے کڈز کارنر کا بھی انعقاد کیا گیا۔ ہر خیمہ نے اپنے منفرد انداز میں شہداء کی خدمات و زحمات اور جانبازی پر خراج تحسین پیش کیا۔

اس فیسٹیول کا ایک ہدف سالِ نو کو یاد شہداء کیساتھ آغاز کرنا بھی تھا۔ جو کہ’’نیو ایئر وِد شہداء‘‘ کے شعار سے منعقد ہوا۔ کئی شہداء کے خانوادگان نے اس فیسٹیول میں شرکت کی، جن کا بھرپور اور شاندار استقبال کیا گیا۔ فرزند شہید قائد علامہ عارف حسین الحسینی حسین الحسینی، فرزند شہید ڈاکٹر سید محمد علی نقوی سلمان نقوی و دختر شہید ڈاکٹر خانم سیدہ زہراء نقوی، دختر شہید استاد سبط جعفر، والدین شہید عمار نقوی، والدین شہید یاسر سمیت کئی شہداء کے خانوادگان شامل تھے۔ ان کے علاوہ مختلف تنظیمی شخصیات، علماء، اکابرین نے بھی شرکت کی۔ جس میں مولانا سید احمد اقبال رضوی، مولانا سید مہدی حسن کاظمی، مولانا سید حسن رضا ہمدانی، مولانا حافظ سید کاظم نقوی، ڈاکٹر مولانا سید علی عباس نقوی، مولانا سید عباس شیرازی (امام جمعہ مسجد ٹھوکر نیاز بیگ لاہور)، مولانا سید جواد موسوی، مولانا سید شہباز بخاری، مولانا سید اسد نقوی، مولانا جعفر علی و دیگر عمائدین ملت شامل تھے۔

یہ بھی پڑھیں: قرآن کی بے حرمتی کا اصل سبب مغرب میں اسلام کے پھیلاؤ کا خوف ہے، علماء کونسل افغانستان

پروگرام میں امامیہ اسکاؤٹس نے شہداء اور خانوادگان شہداء کو سلامی پیش کی، جس کے بعد معظم علی مرزا اور اختتام پر شاہد علی شاہد نے منقبت خوانی کی اور سلام فرماندہ پیش کرکے امام زمانہ (عج) کو سلام عقیدت پیش کیا۔ اس فیسٹیول میں کئی ادارے انتظامی تعاون فراہم کر رہے تھے۔ جن میں ادارہ التنزیل پاکستان، شہید فاؤنڈیشن، ادارہ جماران لاہور، مجلس وحدت مسلمین پاکستان، آئی ایس او (طالبات)، نور سلیمانی ٹیم، جامعہ بعثت، خواجگان ہوتے فورم اور دستہ ابو طالب شامل تھے۔ علاوہ ازیں لاہور بھر کے قرآنی سینٹرز اور مدارس کے طلباء و طالبات نے بھرپور شرکت کی۔

تمام اداروں اور پلیٹ فارمز نے مشترکہ طور پر جغرافیائی تعصب سے بالا تر ہو کر ان تمام شہداء کے نظریات و افکار کا احیاء کیا جو اپنے لہو کے آخری قطرے تک الہٰی اہداف تک رسائی کیلئے سرگرم عمل رہے اور امام زمانہ(عج) کے ظہور کی زمینہ سازی کرتے ہوئے اپنی جان تک قربان کر دی۔ شہداء فیسٹیول ان شہداء سے تجدید عہد کرنے اور نصرت امام زمانہ (عج) کا علم بلند کرنے کا بہترین ذریعہ ہے۔ عاشقان شہداء نے کثیر تعداد میں اپنی فیملیز اور بچوں کے ہمراہ شرکت کی اور شہداء کی معرفت کے وسیلے امام زمانہ (عج) کی حمایت و نصرت کا پرچم نسل نو کو منتقل کرنے کا عزم کیا۔