ایران، پورپی پارلیمنٹ کی قرارداد کا منہ توڑ جواب دے گا، محمدباقر قالیباف

شیعیت نیوز: ایران کی پارلیمنٹ مجلس شورائے اسلامی کے اسپیکر محمدباقر قالیباف نے یورپی پارلیمنٹ کی جانب سے سپاہ پاسداران کو دہشت گرد گروہوں کی نام نہاد فہرست میں شامل کیے جانے پر سخت ردعمل ظاہر کیا ہے۔

شمالی ایران کے شہر بندر انزلی میں شہدا کی یاد میں منعقدہ ایک تقریب سے خطاب کرتے ہوئے اسپیکر محمدباقر قالیباف کا کہنا تھا کہ ایران کی پارلیمنٹ یورپی پارلیمنٹ کے اس اقدام کا منہ توڑ جواب دے گی۔

انہوں نے کہا کہ ایران کی پارلیمنٹ بھی دہشت گردی کی حامی یورپی حکومتوں اور ان کی مسلح افواج کو دہشت گرد گروہوں کی فہرست میں شامل کرے گی۔

محمدباقر قالیباف نے کہا کہ یورپی حکومتوں کے لیے بہتر ہے کہ وہ خود کو امریکہ اور اسرائیل کے عالمی استکبار کے خفیہ تسلط سے آزاد کریں اور خطے میں دانشمندانہ فیصلے کریں ورنہ انہیں نقصان اٹھانا پڑے گا۔

انہوں نے کہا کہ یورپی ملکوں کے رویئے سے ظاہر ہوتا ہے کہ انہوں نے دہشت گردی اور دہشت گردوں کی حمایت کو اپنی سرکاری پالیسیوں کا حصہ بنا رکھا ہے۔

یہ بھی پڑھیں : روس موسم بہار میں یوکرین کے خلاف نئی فوجی کارروائی شروع کرے گا، راب بائر کا دعویٰ

دوسری جانب ایرانی محکمہ خارجہ کے ترجمان نے کہا ہے کہ دہشت گردوں کے عالمی کلب کا پاسداران اسلامی انقلاب سے غصے کی وجہ واضح ہے؛ سپاہ پاسداران دنیا کی سب سے بڑی انسداد دہشتگردی کی تنظیم ہے۔

ارنا رپورٹ کے مطابق ناصر کنعانی نے یورپی پارلیمنٹ میں ایران مخالف قرارداد کے رد عمل میں ایک ٹوئٹر پیغام میں کہا کہ اسرائیل کی نسل پرست ریاست، دنیا کی سب سے بڑی منظم دہشت گرد شناخت ہے، برطانوی حکومت اس کی بانی ہے اور امریکی حکومت اس کی سب سے بڑی حمایت کرنےوالی ہے۔

انہوں نے مزید کہا کہ دہشت گردوں کے عالمی کلب کا پاسداران اسلامی انقلاب سے غصے کی وجہ واضح ہے؛ سپاہ پاسداران دنیا کی سب سے بڑی انسداد دہشت گردی کی تنظیم ہے۔