دختر رسول اکرمؐ حضرت فاطمہ زہراسلام اللہ علیہا کے یوم شہادت کا عقیدت اور احترام کے ساتھ انعقادجاری

شیعیت نیوز: شہادت دختر پیغمبر اکرم ؐ حضرت فاطمہ زہرا (س) کی مناسبت سے ملک بھرمیں عزاداری کا سلسلہ جاری ہے ۔ تمام چھوٹے بڑے شہروں ، قصبوں اور دیہاتوں میں مجالس اور جلوس ہائے عزا کا انعقاد مذہبی عقیدت اور احترام کے ساتھ کیاجارہاہے۔

تفصیلات کےمطابق شہزادی کونین، خاتون جنت ، دختر پیغمبر اکرمؐ جناب سیدہ فاطمہ زہرا سلام اللہ علیہا کے یوم شہادت کے موقع پر دنیابھرکی طرح پاکستان میں بھی مجالس و عزاداری کا انعقاد کیا جارہا ہے ۔

کراچی ، لاہور، اسلام آباد، کوئٹہ، سکردو، گلگت، پشاور سمیت ہر شہر اور قصبے میں مجالس عزا منعقد کی جارہی ہیں اور جلوس ہائے عزا برآمد کیئے جارہے ہیں ۔علماء و خطباء جناب سیدہ فاطمہ زہرا سلام اللہ علیہا کی مظلومیت، ان کے فضائل اور مصائب بیان کررہے ہیں۔جبکہ مختلف شہروں میں جنت البقیع اورجناب سیدہؑ کے گھر و در کی منظر کشی بھی کی گئی ہے ،جس پر ظالموں نے آگ لگائی اور جناب شہزادی کونینؑ کی شہادت واقع ہوئی۔

یہ بھی پڑھیں: دختر رسول اکرمؐ کی دختر حضرت فاطمہ زہراسلام اللہ علیہا کے ایام شہادت کا عقیدت اور احترام کے ساتھ انعقادجاری

واضح رہے کہ شیعیان حیدرکرارؑ ہر دو روایات کے پیش نظر اسلامی کلینڈ ر کے مطابق13 جمادی الاول اور 3 جمادی الثانی دونوں تاریخوں کے مطابق حضرت فاطمہ زہراسلام اللہ علیہا کی شہادت مناتے ہیں۔ جبکہ گذشتہ چند سالوں سے ان دونوں تاریخوں کے درمیان مسلسل 20روز تک مجالس عزا اورجلوس و عزاداری کا سلسلہ بھی جاری نظر آرہا ہے ۔

دوسری جانب پاکستان سمیت دنیا بھر سے ہزاروں زائرین جنت البقیع مدینہ منورہ میں دختر رسول حضرت زہراسلام اللہ علیہا کی قبر منور پر حاضری پر عائد پابندی کے سبب کریمہ اہل بیتؑ حضرت فاطمہ معصومہ ؑ کے مرقد پر قم المقدسہ میں جمع ہوکر پرسہ پیش کررہے ہیں ۔