پاکستان کے اھل سنت محب اھل بیت ہیں جو آل رسول سے عشق کی حد تک محبت کرتے ہیں، علامہ مقصود ڈومکی

شیعیت نیوز: مجمع جہانی اہل بیت کا ساتواں اجلاس تہران میں منعقد ہوا اجلاس میں دنیا کے 117 ممالک سے علماء کرام دانشوران ملت اور مکتب اھل بیت علیھم السلام کی اہم شخصیات شریک ہوئیں۔ اس موقع پر ایشیا افریقہ یورپ اور مشرق وسطی کے ممالک کے کمیشنز کے اجلاس بھی منعقد ہوئے۔ ایشیا کمیشن کے اجلاس سے خطاب اور ابناء نیوز ایجنسی سے گفتگو کرتے ہوئے علامہ مقصود علی ڈومکی نے کہا کہ پاکستان میں حالیہ بارش اور سیلاب نے وسیع پیمانے پر تباہی مچائی ہے اور ملک کا دوتہائی رقبہ زیر آب آنے کے سبب ہزاروں نہیں بلکہ لاکھوں لوگوں کے گھر ڈوب گئے۔ سب کو چاہئے کہ مشکل کی اس گھڑی میں متاثرین کی مدد کریں۔

یہ بھی پڑھیں: JDC کی جانب 50سے زائد امدادی ٹرکوں کا قافلہ نشتر پارک سے روانہ

انہوں نے کہا کہ وطن عزیز پاکستان میں شیعہ اور سنی آپس میں متحد ہیں اگر عالمی استکباری قوتوں نے شیعہ سنی کے درمیان نفرتوں کو ہوا دینے کے لئے زبردست سرمایہ گذاری کی مگر ان کی ہر سازش ناکام رہی۔ پاکستان کے اھل سنت محب اھل بیت ہیں جو آل رسول سے عشق کی حد تک محبت کرتے ہیں۔انہوں نے کہا کہ اربعین شہدائے کربلا کے موقع پر دنیا بھر میں عاشقان اھل بیت جلوس نکالتے ہیں پاکستان میں اربعین کے موقع پر عزاداروں کے خلاف مقدمات کا اندراج ناقابل قبول اور ہماری مذہبی آزادی پر حملہ ہے۔