یوم قدس کی ریلیوں میں عوام کی شرکت سے ثابت ہوگيا کہ مسئلہ فلسطین کم رنگ نہیں ہوا
شیعیت نیوز: حجۃ الاسلام والمسلمین کاظم صدیقی نے تہران یونیورسٹی میں نماز عید سعید فطر کے خطبوں میں کہا ہے کہ عظیم الشان یوم قدس کی ریلیوں میں عوام کی بھر پور شرکت سے ثابت ہوگيا ہے کہ مسئلہ فلسطین کم رنگ نہیں ہوا ہے۔
حجۃ الاسلام صدیقی نے یوم قدس کی ریلیوں میں امت مسلمہ ، مزاحمتی محاذ اور ایرانی عوام کی بھر پور شرکت پر شکریہ ادا کرتے ہوئے کہا کہ کورونا کی وجہ سے دو سال تک یوم قدس نہیں منایا گیا لیکن دو سال کے بعد جب یوم قدس منایا گیا تو ایران سمیت عالمی سطح پر مسلمانوں نے یوم قدس کی ریلیوں میں بھر پور شرکت کرکے ثابت کردیا کہ مسئلہ فلسطین کو کوئی چیز کم رنگ نہیں کرسکتی ، مسئلہ فلسطین عالم اسلام کا پہلا مسئلہ ہے اور مسلمانوں فلسطین اور بیت المقدس کی آزادی تک فلسطینی مسلمانوں کے ساتھ ہیں۔
انھوں نے کہا کہ فلسطینی جوانوں نے ثابت کردیا ہے کہ وہ اپنی سرزمین کی آزادی تک آرام اور سکون سے نہیں بیٹھیں گے۔
یہ بھی پڑھیں : جامعہ کراچی خودکش حملہ، تفتیشی حکام نے ایک طالب علم کو گرفتار کرلیا
حجۃ الاسلام صدیقی نے افغانستان کے حالیہ حوادث کی جانب اشارہ کرتے ہوئے کہا کہ انسانی حقوق کے دعویداروں کی افغانستان، یوکرائن اور یمن کے بارے میں دوگانہ اور متضاد پالیسی دنیا کے سامنے نمایاں ہوگئي ہے۔جو لوگ انسانی حقوق کے مدعی ہیں انھیں انسانی حقوق کی خبر بھی نہیں۔
حجۃ الاسلام صدیقی نے افغانستان کی عبوری حکومت سے افغانستان کے عوام کی سلامتی کو سکیورٹی کو یقینی بنانے اور دہشت گردوں کا خاتمہ کرنے کا مطالبہ کیا ۔
واضح رہے کہ اسلامی جمہوریہ ایران کے دارالحکومت تہران میں نماز عید سعید فطر حجۃ الاسلام والمسلمین کاظم صدیقی کی امامت میں ادا کی گئی۔
نماز فطر میں لاکھوں مؤمنین نے شرکت کی اور نماز کے بعد ایکدوسرے کو عید سعید فطر کی مناسبت سے مبارکباد پیش کی۔ تہران یونیورسٹی کے دروازے صبح سات بجے نمازیوں کے لئے کھول دیئے گئے تھے۔
