ترکی نے جاسوسی کے الزام میں گرفتار اسرائیلی جوڑے کو رہا کردیا

شیعیت نیوز: اسرائیلی حکومت نے اعلان کیا ہے کہ ترکی میں ترک صدر طیب ایردوآن کی رہائش گاہ کی تصاویر لینے کے الزام میں گرفتار اسرائیلی جوڑے کو رہا کر دیا گیا ہے۔

اسرائیلی وزیر اعظم نفتالی بینیٹ نے جوڑے کے خلاف جاسوسی کے الزامات کو رد کرتے ہوئے کہا کہ موردی اور نتالی اوکنن کسی بھی اسرائیلی سرکاری ایجنسی کے لئے کام نہیں کرتے ہیں۔ ان کے مطابق ان کی حکومت نے ایک سینئر عہدیدار کو ترکی بھیج کر اس جوڑے کی رہائی یقینی بنائی ہے۔

اسرائیلی وزیر اعظم نفتالی بینیٹ اور وزیر خارجہ یائر لپید نے ایک مشترکہ بیان میں بتایا کہ ترکی کے تعاون کے نتیجےمیں موردی اور نتالی اوکنن کو رہا کر دیا گیا ہے اور وہ جلد اسرائیل واپس پہنچ جائیں گے۔

بیان میں مزید کہا گیا کہ ہم ترکی کے صدر اور ان کی حکومت کے مشکور ہیں کہ انہوں نے ہمارے ساتھ تعاون کیا۔ ہم جوڑے کے استقبال کے لئے تیار ہیں۔

ترک عدالت نے استنبول کے مشہور ٹاور کملیکا سے ترک صدر طیب ایردوآن کے گھر کی تصاویر لینے والے ایک اسرائیلی جوڑے کو 12 نومبر کو حراست میں لے لیا تھا۔

یہ بھی پڑھیں : ایران نے کمال کردیا، پاکستان کے ساتھ 5ارب ڈالر کا تجارتی معاہدہ،تیل کی کمی بھی پوری ہوگی

ترکی کی سرکاری نیوز ایجنسی اناضول کے مطابق ٹاور کے ایک ملازم نے جوڑے کو مشکوک تصاویر بناتے دیکھ کر پولیس کو مطلع کیا جس کے بعد جوڑے اور ان کے ساتھ موجود ایک ترک باشندے کو حراست میں لے لیا گیا۔

واضح رہے کہ ایک اسرائیلی رپورٹ میں کہا گیا ہے کہ ترکی میں ایک اسرائیلی جوڑے کی گرفتاری ترک صدر رجب طیب ایردوآن کے محل کی فلم بندی کے تناظر میں عمل میں آئی تھی۔

اسرائیلی چینل 12 کے مطابق ابتدائی تفصیلات سے پتہ چلتا ہے کہ ایک اسرائیلی اور اس کی اہلیہ نے ایردوآن کے محل کی تصویر کھنیچی اور وہ تصاویر ایک فیملی گروپ کو واٹس ایپ ایپلی کیشن میں بھیجیں، لیکن وہ نہیں جانتی تھیں کہ محل کی تصویر کھینچنا ممنوع ہے۔

چینل 12 نے اہلیہ کی بہن کے حوالے سے بتایا کہ ہمیں معلوم ہوا کہ انہیں منگل کو واپس آنا تھا اور وہ اچانک غائب ہو گئے اور ہم بہت پریشان ہیں۔

چینل نے مزید کہا کہ یہ جوڑا اسرائیل کا رہائشی ہے اور ان میں سے ایک کی سالگرہ کی چھٹی پر ترکی گئے تھے۔ انہیں  منگل کو ترکی سے واپس آنا تھا۔  ان کی واپسی میں ناکامی سے خاندان کی پریشانی میں اضافہ ہوا۔