دبئی میں دنیا کی سب سے بڑی بندرگاہ جبل علی پر رات گئے زوردار دھماکہ
شیعیت نیوز: متحدہ عرب امارات کے شہر دبئی میں دنیا کی سب سے بڑی بندرگاہ جبل علی پورٹ میں رات گئے زوردار دھماکہ ہوا ہے جس سے پورا دبئی ہل کر رہ گیا۔
دھماکہ کے بعد بندرگاہ پر کھڑے کینٹینر میں آگ لگ گئی جس کے شعلے آسمان سے باتیں کرتے دکھائی دیئے، دھماکہ سے قریبی عمارتوں کے شیشے اور دروازے ٹوٹ گئے، دھماکہ اتنا شدید تھا کہ اس کی آواز پورے دبئی میں سنی گئی، ابتدائی اطلاعات کے مطابق ابھی تک دھماکے سے کسی جانی نقصان کی اطلاع نہیں ہے۔
عرب میڈیا کے مطابق جبل علی پورٹ کے نزدیک رات گئے ایک زور دار دھماکہ ہوا ہے۔ امارت دبئی کے میڈیا دفتر نے ایک ٹویٹ میں دھماکے کی تصدیق کرتے ہوئے کہا ہے کہ دھماکے سے جبل علی پورٹ پر لنگرانداز ایک جہاز پر لدے کنٹینر میں آگ لگ گئی ہے۔
دھماکہ اتنا شدید تھا کہ جائے حادثہ کے 25 کلومیٹر کے اردگرد کے علاقے میں موجود عمارتیں لرز کر رہ گئیں اور شیشے کی کھڑکیاں اور دروازے ٹوٹ گئے۔ حکام کے مطابق ابتدائی طور پر ابھی اس بابت بھی پتا نہیں چل سکا کہ جس جہاز میں دھماکہ ہوا ہے وہ کس ملک سے آیا تھا؟۔
یہ بھی پڑھیں : یمن میں پانچ برطانوی انٹیلی جنس جاسوسوں کو سزائے موت
العربیہ کے مطابق دھماکہ بندرگاہ پر کھڑے جہاز میں ہوا جس کے فوری بعد بحری جہاز میں آگ لگ گئی، دھماکے کے فوری بعد امدادی ٹیموں نے کارروائی کرتے ہوئے آگ پر قابو پالیا ہے۔
سرکاری حکام کا کہنا ہے کہ دھماکہ کی وجہ معلوم نہیں ہو سکی اور نہ ہی فوری طور پر دھماکے سے ہونے والے نقصان کے حوالے سے کوئی حتمی بات کہی جا سکتی ہے۔
جبل علی پورٹ کی انتظامیہ کا کہنا تھا کہ اس بات کو یقینی بنایا جا رہا ہے کہ بندرگاہ پر کسی رکاوٹ اور تعطل کے بغیر جہازوں کی نقل و حرکت جاری رہے۔
دوسری طرف ڈی ایم او کی ڈائریکٹر جنرل مونا الماری کا کہنا تھا کہ ایسا حادثہ دنیا میں کسی بھی جگہ ہوسکتا ہے، دبئی حکومت نے دھماکے کے فوری بعد حادثے کی تفصیلات میڈیا کو بتا دی ہیں تاکہ بے بنیاد افواہوں کے پھیلنے کی بجائے شہریوں کو حقیقت معلوم ہو سکے۔
انہوں نے کہا کہ دھماکے کی وجوہات جاننے کے لئے تحقیقاتی ٹیموں نے اپنی کارروائی شروع کردی ہے۔
