صیہونی فوجیوں کی دہشت گردی، 20 سالہ فلسطینی نوجوان شہید
شیعیت نیوز: فلسطین کے مغربی کنارے کے شمالی علاقے نابلس میں صیہونی فوجیوں کی فائرنگ سے ایک 20 سالہ فلسطینی نوجوان فرید علی حسن شہید ہوگیا ہے۔
فلسطین کی وزارت صحت کی رپورٹ کے مطابق 20 سالہ فلسطینی نوجوان فرید علی حسن نابلس کے قریب واقع دیہی علاقے قصرا میں صیہونی فوجیوں اور فلسطینیوں کے مابین ہونے والے تصادم میں شہید ہوا۔
اسرائیلی فوجیوں نے انتہائی بے رحمی کے ساتھ فلسطینی نوجوان کے سینے میں گولی مار کر اسے شہید کردیا۔
واضح رہے کہ مغربی کنارے کے شمالی علاقے نابلس کے بیتا ٹاؤن میں سیکڑوں فلسطینیوں نے نماز جمعہ کی ادائیگی کے بعد غیر قانونی اور جابرانہ صیہونی آبادکاری کے خلاف مظاہرہ کیا جس پر صیہونی فوجیوں نے دھاوا بول کر کم از کم تین سو فلسطینیوں کو زخمی کر دیا۔ اطلاعات کے مطابق یہ افراد پلاسٹک کی گولیوں اور آنسو گیس کے شدید استعمال کے باعث زخمی ہوئے ہیں۔
یہ بھی پڑھیں : سیکڑوں فلسطینیوں کا صدر محمود عباس کی برطرفی کا مطالبہ
اُدھر مغربی کنارے کے مسافر یطا اور بیت دجن نامی علاقوں میں بھی فلسطینی عوام نے صیہونی حکومت کے غاصبانہ اور جابرانہ منصوبوں اور اپنی زمینوں پر صیہونی بستیوں کی غیر قانونی تعمیر کے خلاف مظاہرہ کیا جسے صیہونی دہشت گردوں نے طاقت کا استعمال کرتے ہوئے کچل دیا۔ فلسطینی باشندوں نے سلفیت شہر کے مغرب میں بسے الراس علاقے میں بھی اُس خطے میں نماز جمعے کا اہتمام کیا جسے غاصب صیہونی ہڑپنے درپے ہیں۔ اس موقع پر فلسطینیوں کی صیہونی فوجیوں کے ساتھ جھڑپیں ہوئی جس میں دسیوں فلسطینی زخمی ہو گئے۔
مقبوضہ فلسطین کے علاقوں میں گزشتہ چند ہفتوں سے صورتحال کشیدہ ہے اور صیہونی فوجیوں اور غاصبوں کے ساتھ فلسطینی نوجوانوں کی جھڑپوں میں شدت پیدا ہوگئی ہے۔
خیال رہے کہ اقوام متحدہ کے منشور کی رو سے فلسطین کے مقبوضہ علاقوں میں جاری صیہونی آبادکاری ایک غیر قانونی عمل ہے مگر صیہونی حکومت امریکہ اور بعض مغربی و عرب ممالک کی حمایت کے باعث تمام تر عالمی قوانین نظرانداز کرتے ہوئے اپنی غاصبانہ اور جارحانہ منصوبوں کو جاری رکھے ہوئے ہے۔
واضح رہے کہ خود ساختہ اسرائیلی ریاست کے ساتھ عرب ملکوں کے سفارتی تعلقات کی بحالی کے بعد سے فلسطینیوں کے خلاف صیہونیوں کے روئیے میں کسی قسم کی کوئی تبدیلی نہیں آئی ہے اور آئے دن فلسطینیوں کے مکانات کو مسمار کئے جانے سے متعلق افسوسناک خبریں عالمی میڈیا پر دیکھنے اور سننے کو مل رہی ہیں۔
