فلسطینیوں کے قتل عام، جارحیت اور مظالم میں امریکہ برابر کا مجرم ہے، حماس

شیعیت نیوز : اسلامی مزاحمتی تحریک حماس نے امریکی وزیرخارجہ انٹنی بلنکن کی شدید الفاظ میں مذمت کرتے ہوئے کہا ہے کہ فلسطینیوں پر ڈھائے جانے والی جارحیت اور مظالم میں امریکہ برابر کا مجرم ہے۔

رپورٹ کے مطابق حماس نے ایک بیان میں کہا ہے کہ امریکہ کی طرف سے یہ کہنا کہ ’’اسرائیل کو اپنے دفاع کا حق حاصل ہے‘‘۔ یہ قابض صیہونی ریاست کو فلسطینیوں کے قتل عام، جارحیت اور مظالم جاری رکھنے کی حمایت کرنا ہے۔

بیان میں کہا گیا ہے کہ امریکی وزیر خارجہ انٹنی بلنکن کھلم کھلا اندھے تعصب کا شکار ہے جو فلسطینیوں کے بجائے اسرائیل کے دفاع کےحق کی حمایت کرتا ہے۔

یہ بھی پڑھیں : حشد الشعبی کی جانب سے ساتویں یوم تاسیس پر پہلی عظیم فوجی پریڈ کا انعقاد

حماس نے امریکہ کو دو ٹوک جواب دیا کہ دفاع کا حق صیہونی حکومت کو نہیں، فلسطین کو حاصل ہے۔

بیان میں کہا گیا ہے کہ اسرائیلی مجرم بم گرا کر فلسطینیوں کو ان کے گھروں کےاندر دفن کررہے ہیں۔ طاقت کا استعمال کرکے فلسطینیوں کو ان کے گھروں سے محروم کیا جا رہا ہے۔ مسجد اقصیٰ پر یہودی آباد کاروں کے حملے جاری ہیں۔ فلسطین میں صحافیوں کے ہاتھ اور پاؤں توڑے جا رہے ہیں اور اس کے باوجود امریکہ آنکھوں پر پٹی باندھ کر صرف قابض اور ظالم ریاست کو دفاع کا حق دے رہا ہے۔

حماس کا کہنا ہے کہ قابض دشمن کو نہیں بلکہ دفاع کا حق فلسطینیوں کو حاصل ہے جنہیں دنیا کے جدید ترین اور انتہائی مہلک ہتھیاروں سے حملوں کا سامنا ہے۔

یاد رہے کہ فلسطینیوں کے راکٹ حملوں کے باعث امریکہ نے صیہونی ریاست کے فضائی دفاعی نظام آئرن ڈوم کو اپ گریڈ کرنے کے لیے اسرائیل کی مدد کا اعلان کیا ہے۔ امریکی وزیر خارجہ انتھونی بلنکن نے کہا ہے کہ امریکہ اسرائیلی آئرن ڈوم نظام کی تجدید کے لیے پُرعزم ہے۔