عزاداری ہماری عبادت ہے،کوئی بھی مذہب و مسلک کسی کو اپنی عبادت پر پابندی کی اجازت نہیں دے سکتا، علامہ باقرزیدی

شیعیت نیوز: مجلس وحدت مسلمین پاکستان سندھ کے صوبائی سیکرٹری جنرل علامہ باقرعباس زیدی کاکہنا ہے کہ پورے ملک میں امام علی علیہ السلام کی شہادت کے حوالے سے مجالس و جلوس عزاء کے سلسلے ایس او پی کے تحت جاری ہیں 19 رمضان سے لیکر 21 رمضان المبارک تک ملک بھر میں عزاداری کے یہ سلسلے جاری رہتے ہیں۔ملت جعفریہ منظم ہے الحمد اللہ عزاداری ہماری عبادت ہے۔ کوئی بھی مذہب و مسلک کسی کو اپنی عبادت پر پابندی کی اجازت نہیں دے سکتا۔21 رمضان المبارک سے قبل این سی او سی کے اجلاس ہونا اور فورا مجالس و جلوس پر پابندیاں لگا دینا اس کی شدید الفاظ میں مذمت کرتے ہیں اور ایسے ملت جعفریہ کے خلاف منظم سازش سمجھتے ہیں۔

ان خیالات کا اظہار انہوں نے صوبائی سیکریٹریٹ میں پریس کرنفرنس کرتے ہوئے کیا، اس موقع پر صوبائی رہنما علامہ علی انور جعفری ، ناصر حسینی، علامہ صادق جعفری، میر تقی ظفر اور دیگر بھی موجود تھے ، انہوں نے کہا کہ اسد عمر کے گڈ گورننس کے دعووں کو خوشنما خوابوں کے سوا کوئی دوسرا نام نہیں دیا جاسکتا۔دس روز قبل ملک بھر میں جلوس عزا کے روٹس پلان علاقائی انتظامیہ اور عزاداران کے درمیان طے پایا۔میڈیا اور جلوس پرمٹ ہولڈرز کو انتظامات کیلئے پرمٹ سرکاری لیٹر جاری ہوئے۔یوم علیؑ سے تین روز قبل یک دم کرونا وبا کو جواز بنا کر جلوسوں پر پابندی لگانا مضحکہ خیز ہے۔

یہ بھی پڑھیں: یوم شہادت امام علیؑ پر جلوس ہر صورت نکالے جائیں گے، کوئی پابندی قبول نہیں، علامہ سبطین سبزواری

انہوں نے کہا کہ حکومت کو ایس او پیز پر عمل درآمد کرانے کا اختیار حاصل ہے لیکن کسی کے مذہبی معاملات میں خلل ڈالنے کا قطعاََ حق حاصل نہیں ماضی میں دہشت گردی کے ذریعے ہمارے جلوس و مجالس کو روکنے کی کوشش کی گئی۔ ملت تشیع کے ہزاروں افراد کو شہید کرنے کے باوجود عزاداری میں کمی نہیں آئی۔ جور یاستی ادارے اپنے احکامات کے ذریعے عزاداری پر پابندی لگانا چاہتے ہیں وہ حقائق سے بے خبر ہیں۔اگر حکومت اپنے ضمنی الیکشن کی مہم چلا سکتی ہے،انتخابات ہو سکتے ہیں،بازاروں میں بے ہنگم ہجوم ہو سکتاہے تو جلوس کیوں نہیں ہو سکتے۔

یہ بھی پڑھیں: سپاہ قدس نے مغربی ایشیا میں غیر فعال سفارتکاری کو روکنے میں اہم کردار ادا کیا، سپریم لیڈر

ان کا مزید کہنا تھا کہ حکومت یہ بات ذہن نشیں کر لے کہ عزاداری کے حوالے سے شیعہ قوم اپنے اصولی موقف سے ایک قدم بھی پیچھے نہیں ہٹے گی۔حکومت کے غیر دانشمندانہ فیصلوں سے لگتا ہے کہ ان کا دین سے کوئی تعلق نہیں۔ ملت تشیع ایک مہذب قوم ہے۔ ہم نے کبھی بھی شائستگی او تہذیب کا دامن ہاتھ سے نہیں چھوڑا۔ ملک کے آئین و قانون کی بالادستی کو ہم مقدم سمجھتے ہیں۔ مجالس و جلوس میں بھی ایس او پیز پر عمل درآمد ہماری قانونی، اخلاقی اور شرعی ذمہ داری ہے۔