اسرائیلی فوج نے مسجد اقصٰی کے امام الشیخ عکرمہ صبری کو گرفتار کر لیا
شیعیت نیوز: اسرائیلی فوج نے مسجد اقصیٰ کے امام الشیخ عکرمہ صبری کو اس وقت حراست میں لیا ہے جب انہوں نے اگلے روز مسجداقصیٰ سے منسوب اسلامی تاریخ کی مقدس شب معراج میں مسجد میں مسلمانوں کے اجتماع کا مطالبہ کیا تھا۔
فلسطینی میڈیا ذرائع کے مطابق آج صبح اسرائیلی فوجیوں نے مقبوضہ بیت المقدس میں مسجد اقصیٰ کے امام الشیخ عکرمہ صبری کو شہر کے الصوانہ محلے میں واقع ان کے گھر پردھاوا بول کر حراست میں لے لیا۔
مسجد اقصیٰ کے امام کو اس سے قبل بھی قبلہ اوّل سے تعلق رکھنے کی پاداش میں متعدد مرتبہ صیہونی زندانوں میں قید کیا جا چکا ہے۔
میڈیا ذرائع نے بتایا کہ درجنوں فوجیوں نےالصوانہ محلے میں واقع الشیخ عکرمہ صبری کے گھرسے انہیں مسلمانوں کے مقدس دن کی تعطیل سے صرف ایک دن پہلے اسرائیلی فوج نے گرفتار کیا ہے جس کا مقصد انہیں مسجد اقصیٰ میں بڑی رات میں خطبے سے روکنا ہے۔
یہ بھی پڑھیں : بیت لحم میں اسرائیلی فوجیوں نے دو فلسطینی لڑکوں کو گولیاں مار دیں
دوسری جانب اسرائیلی فوج نے منگل کے روز فلسطین کے علاقوں مقبوضہ مغربی کنارے اور مقبوضہ بیت المقدس میں تلاشی کی کارروائیوں کے دوران متعدد فلسطینیوں کو حراست میں لے لیا۔
قابض فوج نے تلاشی کی کارروائیوں کے دوران فلسطینیوں کے گھروں میں گھس کر لوٹ مار، توڑپھوڑ اور شہریوں کو زد و کوب کیا۔
غرب اردن کے جنوبی شہر الخلیل میں اسرائیلی فوج نے تلاشی کے دوران 26 سالہ عدی حمیدان الشرباتی، ھانی شاکر الفاخوری اور عبدالھادی ابو خلف کو ان کے گھروں میں گھس کر گرفتار کیا۔ تلاشی کے دوران اسرائیلی فوج نے ان کے گھروں میں گھس کر توڑپھوڑ اور لوٹ مار بھی کی۔
مقامی فلسطینی ذرائع نے بتایا کہ قابض صیہونی فوج نے الخلیل سے ایک اور فلسطینی کو گرفتار کیا ہے تاہم اس کی شناخت نہیں کی جاسکی ہے۔ اسرائیلی فوج نے فلسطینی شہری سراج فاخوری کے گھر میں بھی گھس کر تلاشی لی اور لوٹ مار اور توڑپھوڑ کی۔
ادھر غرب اردن کے شمالی شہر جنین میں اسرائیلی فوج نے السیلہ الحارثیہ سے محمد منیر طحاینہ اور شمالی علاقے عرابہ سے صالح صبری کو حراست میں لے لیا۔
اسرائیلی فوج نے اندرو فلسطین میں ایک کارروائی کے دوران داود حسام متعب طحاینہ اور محمد عمر نجیب العمری کو گرفتار کرکے نامعلوم مقام پر منتقل کردیا۔
ادھر رام اللہ میں اسرائیلی فوج نے گھر گھر تلاشی کے دوران تین فلسطینیوں اسامہ التیمیمی، ایاس التیمیمی اور مومن کسبہ کو حراست میں لے لیا۔
اسرائیلی فوج نے مقبوضہ بیت المقدس میں تلاشی کے دوران حسام فرعون، نزار بصہ،ابو دیس سے خمیس بحر کو حراست میں لے لیا۔
