پاکستان بھاری اکثریت سے اقوام متحدہ کی انسانی حقوق کونسل کا رکن منتخب

اسلام آباد:پاکستان کو ایک اوراہم سفارتی کامیابی مل گئی،پاکستان بھاری اکثریت سے191 میں سے 169 ریکارڈ ووٹ حاصل کرکے 5ویں بار آئندہ 3سال کیلئے اقوام متحدہ کی انسانی حقوق کونسل کا رکن منتخب ہو گیا ۔

پاکستان نے ایک اور اہم سفارتی کامیابی حاصل کی ہے اور دفتر خارجہ کے مطابق پاکستان بھاری اکثریت سے، آئندہ 3سال کیلئے اقوام متحدہ کی انسانی حقوق کونسل کا رکن منتخب ہو گیا ہے ۔

پاکستان نے اقوام متحدہ انسانی حقوق کونسل کے انتخابات میں ریکارڈ191 میں سے 169 ووٹ حاصل کےک جو کہ ایشیا پیسیفک ریجنل میں سب سے زیادہ ہیں ۔

اس حوالے سے وزیر خارجہ شاہ محمود قریشی نے کہا ہے کہ پاکستان کو اتنی کثیر تعداد میں ووٹوں کا ملنا،عالمی سطح پر پاکستان کی پالیسیوں پر اعتماد کا اظہار ہے،پاکستان نے ہمیشہ اقوام متحدہ سمیت تمام عالمی فورمز پر بنیادی انسانی حقوق کے تحفظ اور انسانی حقوق کی پاسداری کیلئے آواز بلند کی ہے ،انسانی حقوق کونسل، اقوام متحدہ کا ایک انتہائی اہم فورم ہے ۔

وزیرخارجہ کا کہنا تھا کہ اقوام متحدہ کی انسانی حقوق کونسل نے ہماری درخواست پر مقبوضہ جموں و کشمیر میں جاری انسانی حقوق کی سنگین خلاف ورزیوں کا نہ صرف نوٹس لیا بلکہ ان مظالم کو رپورٹس کی شکل میں مرتب کیا اوربھارت کے غیرقانونی اقدام کا پردہ چاک کیا ۔

شاہ محمود قریشی نے مزید کہا کہ پاکستان اقوام متحدہ انسانی حقوق کونسل کے پلیٹ فارم پر مقبوضہ کشمیر کے مظلوم باسیوں سمیت دنیا بھر کے مظلوموں کے حق میں آواز اٹھاتا رہے گا۔