نئی دہلی فسادات میں جاں بحق کی تعداد 46 ہو گئی، شاہین باغ میں دفعہ 144 نافذ
شیعت نیوز: شہریت ترمیمی قانون کے خلاف شاہین باغ میں جاری دھرنے کے نزدیک تصادم سے بچنے کے لئے انتظامیہ نے اس علاقے میں دفعہ 144 نافذ کردی گئی۔
بھارتی میڈیا کی رپورٹ کے مطابق شمالی نئی دہلی میں فسادات سےمتاثرہ علاقوں گوکل پوری، شیوویہاڑ کےنالوں سے 4 لاشیں ملنے سے جاں بحق افراد کی تعداد46ہو گئی جبکہ تقریبا 300 زخمیوں کا مختلف ہسپتالوں میں علاج ہو رہا ہے جن میں سے کئی کی حالت تشویشناک بتائی جاتی ہے۔
یہ بھی پڑھیں : بھارتی مسلمانوں پر مظالم، او آئی سی اور عرب لیگ غیرت ایمانی کا مظاہرہ کریں ، علامہ رضی جعفر
تشدد سے متاثرہ علاقوں میں بڑی تعداد میں پولیس اور نیم فوجی دستے تعینات ہیں اورفساد زدہ علاقوں میں آہستہ آہستہ معمولات زندگی پٹری پر واپس آنے کے ساتھ ہی پولیس نے بڑے پیمانے پر گرفتاریوں کا سلسلہ شروع کر دیا ہے اور اس سلسلے میں اب تک 167 ایف آئی آر درج کرکے 885 لوگوں کو پوچھ گچھ کے لئے حراست میں لیا جا چکا ہے۔
یہ بھی پڑھیں : بھارت میں مسلمانوں کو شدید خطرات لاحق ہوگئے ہیں۔ اسلامی تعاون تنظیم
دوسری جانب ہندو سینا نے یکم مارچ کو شاہین باغ سڑک خالی کرانے کی اپیل کرتے ہوئے کہا تھا کہ شاہین باغ میں سی اے اے کی تحریک کے خلاف مظاہرہ کیا جائے گا جس کے بعد انتظامیہ نے کسی قسم کے ممکنہ ناخوشگوار واقعہ سے بچنے کے لئے بڑی تعداد میں پولیس فورس کو تعینات کر کے شاہین باغ کے علاقے میں دفعہ 144 نافذ کردی۔
