سربراہ مہدی ملیشیامقتدیٰ الصدر کا امریکہ کے حوالے سے اہم بیان سامنے آگیا
مقتدیٰ الصدر نے کہا کہ عراقی عوام کی مشکلات کا اصلی سبب امریکہ ہے، خطے میں دہشت گردی کو فروغ دینے میں بھی امریکہ کا ہاتھ ہے
شیعت نیوز: عراق کے ممتاز عالم دین اور سربراہ مہدی ملیشیا مقتدیٰ الصدر نے حشد الشعبی پر امریکی حملے کی مذمت کرتے ہوئے کہا ہے کہ ہم عراق میں امریکہ کی موجودگی کے پہلے ہی خلاف تھے اور ہم آج بھی امریکی فوج کے عراق سے انخلا کا مطالبہ کرتے ہیں اگر سیاسی طریقہ سے خارج ہو جائیں تو بہتر ہے ورنہ ہمارے پاس دوسرے آپشنز بھی موجود ہیں۔
یہ بھی پڑھیں: آغازِسال نو خدا کی نافرمانی کے بجائے امن وسکون، ترقی وپیشرفت کی دعا کیساتھ ہوناچاہئے،سربراہ ایم ڈبلیوایم
مقتدیٰ الصدر نے کہا کہ ہم عراق کو بین الاقوامی تنازع کا مرکز نہیں بننے دیں گے عراقی عوام ایسا برداشت نہیں کریں گے۔ مقتدیٰ الصدر نے کہا کہ اگر ہم دشمن کو مزاحمت کے ذریعہ نکالنے کے سلسلے میں تعاون کرتے تو ہمیں آج یہ دن نہ دیکھنا پڑتا۔ اگر توہین آمیز معاہدے پر دستخط نہ کرنے پر ہمارا باہمی تعاون ہوتا، تو ہم دشمن کو ملک سے باہر نکال دیتے۔
یہ بھی پڑھیں: عراق پر امریکہ کی فوجی یلغار دہشت گردی کا آشکارا مصداق ہے ، ترجمان ایرانی وزارت خارجہ
مقتدیٰ الصدر نے کہا کہ عراقی عوام کی مشکلات کا اصلی سبب امریکہ ہے، خطے میں دہشت گردی کو فروغ دینے میں بھی امریکہ کا ہاتھ ہے۔ ہمیں اب سیاسی مذاکرات کے ذریعہ دشمن کو ملک سے باہر نکالنے کی کوشش کرنی چاہیے اور اگر وہ مذاکرات کے ذریعہ عراق سے خارج نہ ہو تو پھر دوسرے آپشنز کے ذریعہ اسے نکالنے کے لئے کوشش کرنی چاہیے۔ مقتدیٰ الصدر نے کہا کہ ہم مضبوط اور خود مختار عراق کے خواہاں ہیں اور ہم کسی کو عراقی قوم کی قسمت کا فیصلہ کرنے کی اجازت نہیں دیں گے۔
