مختار ثقفی پر تہمت اور الزام لگانے والے وہی ہیں جن کے آباؤاجدادمختارکے ہاتھوں قتل ہوئے،سبطین سبزواری
ان کا کہنا تھا کہ مختار ثقفی کے دشمن اورناقدین، دراصل تشیع میں پھوٹ ڈالنا چاہتے ہیں ۔ قوم سے اپیل کرتے ہیں کہ وہ ایسے عناصر کا محاسبہ کریں اور قومی وحدت کو برقرار رکھیں۔
شیعت نیوز: شیعہ علما کونسل شمالی پنجاب کے صدر علامہ سید سبطین حیدر سبزواری نے واضح کیا ہے کہ مختارثقفی ، تشیع میں مسلمہ شخصیت، ہیرواور مجاہد ہیں جنہوں نے امام حسین علیہ السلام اور شہداءکربلا کے قاتلوں کو تہہ تیغ کرکے بدلہ لیا۔ تشیع نے، امیر مختار کے اہل بیت کے دشمنوں کے خلاف انتقامی جذبے کو نہ صرف قبول کیا بلکہ اسے سراہا اور اس پرآج بھی فخر کرتا ہے۔وہ مسلمہ شیعہ مسلمان ہیں۔
انہوں نےکہاکہ ان پر نبوت کے جھوٹے دعوے کاالزام بدبختی اور جھوٹ کے پلندے کے علاوہ کچھ نہیں ہے۔ یہ تہمت اورالزام ان لوگوں نے لگایا جن کے آباؤاجداد مختار ثقفی کے ہاتھوں قتل ہوئے تھے ۔ یہ اغیار اور دشمنان اہل بیت کی سازش تھی۔ اسی طرح دشمنان اہل بیت نے امیر تیمور جیسے محب اہل بیت پر بھی الزامات لگائے گئے اور اسے تیمور لنگ کہنے لگے ۔ ان خیالات کا اظہار انہوں نے مختلف وفود سے گفتگو کرتے ہوئے کیا۔
یہ بھی پڑھیں: حضرت مختار ثقفی کے خلاف پروپگینڈاکرنے والے بنو امیہ کے پیروکارہیں،علامہ قاضی نیاز نقوی
انہوں نے کہا کہ مختار ثقفی زبیری، مروانی اور بنوامیہ گروپوں کے مخالف تھے اور اسی وجہ سے ان پر دعویٰ نبوت کا الزام اہل بیت کے دشمنوں کی طرف سے عائد کیا گیا لیکن شیعہ فقہاءنے امیر مختار ثقفی پر منفی الزامات کی نہ صرف تردید کی بلکہ ان بدبختوں کی مذمت بھی کی۔ ان کا کہنا تھا کہ مختار ثقفی کے دشمن اورناقدین، دراصل تشیع میں پھوٹ ڈالنا چاہتے ہیں ۔ قوم سے اپیل کرتے ہیں کہ وہ ایسے عناصر کا محاسبہ کریں اور قومی وحدت کو برقرار رکھیں۔
انہوں نے کہا کہ دشمنان اہلبیت پر قاتلانان امام حسین علیہ السلام میں سے پانچ کے سر ایک خط کے ہمراہ حضرت امام زین العابدین علیہ السلام کے پاس بھجوایا تو امام مسکرائے ، خوشی کا اظہار کیا اور اور اپنے گھر والوں سے کہا کہ اظہار مسرت کے طور پر گھروں کو روشن کریں ۔علامہ سبطین سبزواری نے کہا کہ عوام تشیع عقائد کو خراب کرنے کی اجازت نہیں دیں گے، ایسے عناصر کی مذمت کرتے ہیں ۔ بھیانک سازش تشیع کو تقسیم کرنے کی ناکام کوشش ہے۔
