ایران سعودی عرب کشیدگی ، وزیراعظم پاکستان ایک روزہ دورے پر سعودی عرب روانہ
وزیراعظم کے ہمراہ وزیرخارجہ شاہ محمود قریشی اور دیگر حکام بھی سعودی عرب گئے ہیں
شیعت نیوز : ایران سعودی عرب کشیدگی کے خاتمے کے لئے مصالحتی کردار ادا کرنے کے حوالے سے وزیراعظم عمران خان آج ایک روزہ دورے پر ریاض روانہ ہوگئے۔وزیراعظم کے ہمراہ وزیرخارجہ شاہ محمود قریشی اور سیکریٹری خارجہ سمیت دیگر حکام بھی سعودی عرب گئے ہیں۔
اطلاعات کے مطابق وزیراعظم پاکستان عمران خان ایران سعودی عرب کشیدگی کے خاتمے کے حوالے سے مصالحت کی کوششیں تیز کرتے ہوئے گزشتہ دنوں دورہ تہران کے بعد آج ریاض کے لئے روانہ ہوگئے ہیں۔ وزیراعظم اپنے دورہ ریاض کے دوران سعودی فرمانروا شاہ سلمان بن عبدالعزیز اور سعودی ولی عہد محمد بن سلمان سے ملاقاتیں کریں گے۔اس دوران خطے کی موجودہ صورتحال پر بھی تبادلہ خیال کیا جائے گا۔
یہ بھی پڑھیں :رہبر انقلاب اسلامی آیت اللہ سید علی خامنہ ای سے وزیراعظم عمران خان کی وفد کے ہمراہ ملاقات
واضح رہے کہ وزارت عظمیٰ کا منصب سنبھالنے کے بعد یہ عمران خان کا تیسرا دورہ ہے۔ اس سے قبل وزیراعظم عمران خان نے ایران کا ایک روزہ دورہ کیا تھا جس میں انہوں نے رہبر انقلاب اسلامی آیت اللہ سید علی خامنہ ای، ایرانی صدر حسن روحانی اور وزیر خارجہ جواد ظریف سے بھی ملاقات کی تھی۔
