آرمی چیف جنرل باجوہ نے 14 تکفیری دہشتگردوں کی سزائے موت کی توثیق کردی

شیعیت نیوز: آرمی چیف جنرل قمر جاوید باجوہ نے 14 خطرناک ملک دشمن تکفیری دہشتگردوں کی سزائے موت کی توثیق کردی۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے 14  تکفیری دہشت گردوں کی سزائے موت جبکہ 20 دہشتگردوں کی مختلف مدت کی سزاؤں میں توثیق کردی، دہشت گردوں کو فوجی عدالتوں نے سزائیں سنائیں جبکہ دہشتگردوں نے جوڈیشنل مجسٹریٹ کے سامنے اپنے جرائم کا اعتراف کیا۔

آئی ایس پی آر کے مطابق دہشت گرد سیکیورٹی اداروں کے اہلکاروں اور تعلیمی اداروں پر حملوں میں ملوث تھے، دہشت گردوں کی کارروائیوں کے نتیجے میں 13 سیکیورٹی اہلکاروں سمیت 16 افراد شہید ہوئے تھے جبکہ گرفتار دہشتگردوں سے بھاری مقدار میں اسلحہ اور گولہ بارود برآمد ہوا تھا۔

آئی ایس پی آر کی جانب سے جاری بیان کے مطابق سزائے موت پانے والے دہشت گردوں میں محی الدین، فضل ہادی، محمد وہاب، برکت علی، باچا وزیر، محمد اسماعیل، گل زمین، گل محمد، بشیر احمد، آفرین خان محمد اسلام اور روح الامین شامل ہیں۔