الیکشن 2018: پاکستان تحریک انصاف کی مجلس وحدت مسلمین سمیت چار جماعتوں سے سیٹ ایڈجسٹمنٹ

شیعیت نیوز: تحریک انصاف نے الیکشن 2018ء میں کامیابی کےلئے مجلس وحدت المسلمینسمیت 4 سیاسی جماعتوں سے سیٹ ایڈجسٹمنٹ کرلی ہے ۔ذرائع کے مطابق پی ٹی آئی نے مجلس وحدت مسلمین، مسلم لیگ(ق)،عوامی مسلم لیگ اورگرینڈ ڈیموکریٹک الائنس سے سیٹ ایڈجسٹمنٹ کی ہے۔

تفصیلات کے مطابق پی ٹی آئی اور مجلس وحدت مسلمین کے مابین پنجاب کی سطح پر معمالات طے پا گئے ہیں جبکہ دوسری جانب پی ٹی آئی اور ق لیگ کے مابین بھی قومی اسمبلی کی 4نشستوں پر معاملات طے ہوئے ہیں۔ پی ٹی آئی کے اعلامیہ کے مطابق شیخ رشید کی جماعت عوامی مسلم سے راولپنڈی کے 2حلقوں این اے 60 اور 62 پر سیٹ ایڈجسٹمنٹ ہوئی ہے جبکہ سندھ میں تحریک انصاف نے پیپلز پارٹی مخالف اتحاد گرینڈ ڈیموکریٹک الائنس کے ساتھ 10سے زائد نشستوں پر سیٹ ایڈجسٹمنٹ کی ہے ۔

مجلس وحدت مسلمین پاکستان کے مرکزی ڈپٹی سیکرٹری جنرل سید ناصر عباس شیرازی نے پی ٹی آئی اور مجلس وحدت مسلمین کے مابین سیٹ ایڈجسٹمنٹ کے حوالے سے کہا ہے کہ کیونکہ تحریک انصاف کا لوکل حوالے سے اور خارجہ پالیسی کے حوالے سے موقف ہمارے قریب تر اور بہتر ہے، میرا خیال ہے کہ اگر اوپر کی سطح پر ڈاکٹرائن اور پالیسی درست ہو تو نیچے بھی وہی پالیسی نظر آتی ہےاس لئے تحریک انصاف سے سیٹ ایڈجسٹمنٹ ہوئی تاہم ان کا کہنا تھا کہ پی ٹی آئی کو ابھی بہت کچھ سیکھنے کی ضرورت ہے، پی ٹی آئی خیبر پختونخوا میں کوئی زیادہ بہتر رول ادا نہیں کرسکی۔ وہاں پر بھی ٹارگٹ کلنگ کا سلسلہ جاری رہا ہے، پی ٹی آئی کو جس طرح رسپانس دینا چاہیے تھا نہیں دیا۔