پاک فوج کے نام سے چلنے والے ۲۵۵ جعلی سوشل میڈیا اکاونٹس کے خلاف کاروائی کا فیصلہ

شیعیت نیوز: پاک فوج نے مسلح افواج کے نام پر چلنے والے 255 جعلی سوشل میڈیا اکاؤنٹس کیخلاف کارروائی کیلئے فہر ستیں فیڈرل انویسٹی گیشن ایجنسی (ایف آئی اے) کے حوالے کر دیں۔ڈی جی آئی ایس پی آر میجر جنرل آصف غفور کی جانب سے ایف آئی اے کو دی گئی فہرست میں 45 ٹوئٹر، 94 فیس بک، 101 یوٹیوب اور 15 انسٹاگرام کے جعلی اکاؤنٹس کی تفصیلات شامل ہیں۔واضح رہے جعلی اکاؤنٹس براہ راست پاکستان آرمی، نیوی اور ایئرفورس کا نام استعمال کر رہے ہیں، جن کے ذریعے یہ تاثر دیا گیا ہے ان اکاؤنٹس میں جو کچھ کہا جا رہا ہے وہ سب فوج کا بیانیہ ہے۔سوشل میڈیا کے ان جعلی اکاؤنٹس میں سے کئی ایسے بھی ہیں، جن پر پاک فوج کے حق میں باقاعدہ ٹوئیٹس کی جاتی تھیں، تاہم آئی ایس پی آر نے ان اکاؤنٹس کیخلاف بھی کارروائی کرکے واضح پیغام دیا ہے کہ فوج ایک منظم ادارہ ہے جہاں قانون کا احترام فرض اول ہے۔ٹوئٹر اکاؤنٹس میں سب سے زیادہ فالورز ‘پاکستان آرمی’ نامی اکاؤنٹ کے ہیں، جن کے 1 لاکھ 21 ہزار فالورز ہیں۔پاکستان ملٹری نامی اکاؤنٹ کے 84 ہزار فالورز ہیں اور ان سے فوج سے متعلق خبریں ٹوئٹ کی جاتی تھیں۔آئی ایس آئی نامی اکاؤنٹ کے 64 ہزار فالورز ہیں، دیگر اکاؤنٹس ‘پراوڈ خاکی’، ‘گڈ سولجر’، ‘فوجی ٹوئٹ’، ‘آئی ایس آئی آر ٹی’اور ‘پروٹیکٹرز’ کے نام سے سرگرم عمل تھے۔فیس بک پر پاکستان کی مسلح افواج کے ناموں سے چلنے والے اکاؤنٹس کی تعداد 94 ہے۔ پاک آرمی کے نام سے اکاؤنٹ کو فالو کرنیوالوں کی تعداد 9 لاکھ 62 ہزار سے زائد ہے۔اسی طرح پاکستان نیوی، ائیر فورس، آئی ایس آئی، آئی ایس پی آر، ڈی جی آئی ایس پی آر، آئی ایس پی آر آفیشل، پاک نیوی آفیشل، پاک ائیر فورس آفیشل، پی اے ایف گرلز اور ایس ایس جی جیسے ناموں کیساتھ بنائے گئے اکاؤنٹس کو فالو کرنیوالوں کی تعداد بھی لاکھوں میں ہے جبکہ فیس بک پر 31 اکاؤنٹس پاک فوج کے شعبہ تعلقات عامہ آئی ایس پی آر کے ٹائٹل کیساتھ ہیں۔