لاپتہ افراد کی عدم بازیابی،علامہ حسن ظفر جمعہ کو کھارادر سے گرفتاری دیں گے
شیعیت نیوز: غیر قانونی طور پر گرفتار اور لاپتہ کئے گئے شیعہ جوانوں کی بازیابی کے لئے ان کے لواحقین گزشتہ کئی روز سے احتجاج کر رہے ہیں اور اب اس احتجاجی تحریک میں شامل ہوتے ہوئےعلامہ حسن ظفر نقوی نے شیعہ گمشدگان کی بازیابی کے لئے جمعہ کو گرفتاری دینے کا اعلان کیا ہے۔
اطلاعات کے مطابق علامہ حسن ظفر نقوی نے جلوس عاشورہ میں احتجاج کے دوران خطاب کرتے ہوئے کہا کہ پورے پاکستان سے شیعہ جوانوں اور علماء کو گھروں سے اُٹھا کر غائب کیا جارہا ہے، ہمیں نہیں معلوم کہ وہ کس حال میں ہیں اور ان کا جرم کیا ہے۔پاکستان کے مقتدر حلقہ اس غیر قانونی اقدامات پر خاموش ہیں۔ علامہ حسن ظفر نقوی نے کہا کہ گمشدہ جوانوں کی بازیابی کے لئے میں جمعہ کو گرفتاری دوں گا اور میں یہ اعلان ذاتی حیثیت میں کررہا ہوں جس سے کسی تنظیم کا کوئی تعلق نہیں ۔ ان کا کہنا تھا کہ یہ اعلان سیاسی نہیں ہے اورمیں اپنی زبان کا سچا و پکاانسان ہوں، اگر مجھے سیاست کرنی ہوتی تو میں عاشورا کے دن گرفتاری کا اعلان کرتا لیکن میں جمعہ کی نماز کے بعد گرفتاری کا اعلان اس لئے کیا ہے کہ میرا ضمیر مطمئن رہے گا ۔
علامہ حسن ظفر نقوی کے مطابق وہ لاپتہ افراد کی بازیابی کے لئے جمعہ کو کھارادر مسجد کے سامنے اپنی گرفتاری پیش کریں گے۔
واضح رہے کہ گزشتہ کئی ماہ میںملک بھر سے سینکڑوں شیعہ جوانوں اور علماء کو ان کے گھروں سے اُٹھا کر لے جایا گیا، جن کے متعلق آج تک کوئی خبر نہیںاور نہ ہی پاکستان کی کسی عدالت میں مقدمات کا اندراج کیا گیا ہے ۔ ان لاپتہ افراد کے اہل خانہ پاکستان بھر میں سراپا احتجاج ہیں ۔
