میڈیا کی اہمیت و افادیت ماضی کی طرح آج بھی مسلمہ ہے ،علامہ راجہ ناصر عباس

شیعیت نیوز: مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری نے میڈیا سیل کہ ذمہ داران سے خطاب کرتے ہوئے کہا ہے کہ میڈیا کی اہمیت و افادیت ماضی کی طرح آج بھی مسلمہ ہے لیکن اس کے انداز میں تبدیلیاں آ چکی ہیں۔ اب میڈیا غیر معمولی افرادی قوت یا بے بہا وسائل کا محتاج نہیں رہا ۔جس اطلاع کی فراہمی میں ماس میڈیا کردار ادا کرنے سے قاصر ہوتا ہے وہاں سوشل میڈیا اپنی حیثیت منوائے بغیر نہیں رہتا۔سانحہ پارہ چنار سمیت متعدد واقعات ایسے ہیں جہاں پرنٹ و الیکٹرانک میڈیا کو حکومتی احکامات کی پیروی میں خاموش رہنا پڑا لیکن سوشل میڈیا پر چلنے والی کمپین نے ان کی خاموشی کو توڑ کر اپنی اہمیت کو ثابت کیا۔ اگر آپ کے پاس درست اور مفید اطلاعات ہیں تو میڈیا کے کسی بھی ذریعے کو استعمال کرتے ہوئے انہیں کم وقت میں ہزاروں افراد تک پہنچایا جاسکتا ہے۔اطلاعات کی فراہمی زیادہ موثر اسی صورت میں ثابت ہو گی جب آپ اپنے قارئین کی دلچسپی سے آگاہ ہوں گے اور جو اطلاع نشر کریں گے وہ پڑھنے والے کے مزاج سے ہم آہنگ ہو گی۔انکا کہنا تھا کہ میڈیا پرسنز کو حقیقت شناس ہونا چاہیے۔دور عصر میں ہمارے لیے سب سے زیادہ نقصان دہ غیر ملکی پروگراموں کی یلغار ہے۔ اس ثقافتی یلغار کے ہتھیار کا مقابلہ کرنے کا ایک اھم وسیلہ میڈیا ہے۔ اس ہتھیار سے ہماری نئی نسل کو گمراہ کیا جا رہا ہے۔ مغربی و ہندوانہ ثقافت کے سیلاب کے آگے بند باندھنے میں ہمارے ان نوجوانوں کو کردار ادا کرنا ہو گا جو میڈیا سے وابستہ ہیں۔ہماری اپنی روایات ، تشخص اور ثقافت ہے۔ہم سے ہماری شناخت چھینے کی کوشیش کی جا رہی ہے۔اس شناخت کو قائم رکھنے کے لیے اپنی معاشرتی ذمہ داریوں سے آگہی انتہائی ضروری ہے ورنہ دشمن کی یلغار ھماری نئی نسل و وطن عزیز کو باآسانی اپنی سازشوں کی اماجگاہ بنادے گی اور ھم سے ھماری اصل کو چھین کر ھمیں غلام بنالے گی