پاکستان آکر ایسا محسوس ہوتا ہے کہ اپنے گھر میں ہوں،امام کعبہ

شیعیت نیوز: امام کعبہ الشیخ صالح محمد بن طالب نے کہا ہے کہ جنرل (ر)راحیل شریف دہشتگردی کی صورتحال کو سمجھتے ہیں اس لئے ان کا کردار اہم ہے اور وہ مسلم دنیا میں امن لائیں گے، امام کعبہ نے پاکستانی قانوں کی تشریح کرتے ہوئے کہا کہ آرمی افسر ریٹائرمنٹ کے بعد کسی بھی جگہ کام کرسکتا ہے اور راحیل شریف کا فوجی اتحاد کا سربراہ بننا پاکستانیوں کیلئے قابل فخر ہے۔نجی ٹی وی کو دئیے گئے انٹر ویو میں امام کعبہ نے مزید کہا کہ پاکستان نے بڑی بہادری اور تیزی سے دہشت گردی پر قابو پایا ہے جس کا کریڈٹ جنرل (ر)راحیل شریف، پاک فوج، عوام اور حکومت کو جاتا ہے۔

پاکستان میں امن ہوگیا ہے اور میں پاکستانیوں کو مبارک باد دیتا ہوں۔ انہوں نے کہا کہ جو اقدامات پاکستان نے کئے وہ سب ضروری تھے، پاکستان اور سعودی عرب نے دہشت گردی کا سب سے زیادہ سامنا کیا۔امام کعبہ نے بتایا کہ ہمیں سمجھنا ہوگا کہ اسلام کا پیغام اخوت اور محبت ہے، اتحاد سے قومیں آگے جاتی ہیں، اختلافات معاشرے کو تباہ کرتے ہیں،امت مسلمہ کو اکٹھا ہونا چاہیے اور یہی سوچ لے کر آیا ہوں۔امام کعبہ نے وضاحت دیتے ہوئے کہا کہ اسلامی اتحاد ایک یا دو ملکوں کا نہیں بلکہ اسلامی اتحاد 38 ملکوں کا ہے، یہ اتحاد دہشت گردی کے خلاف ہے، مسلم ممالک میں امن سے پوری دنیا میں امن قائم ہوگا۔امام کعبہ نے یہ بھی کہا کہ پاکستان آکر ایسا محسوس ہوتا ہے کہ اپنے گھر میں ہوں، اللہ پاکستان کی حفاظت فرمائے۔