اسلامی برادری میں آگے بڑھنے کا ایک اہم ترین عامل انتظار، ڈاکٹر روحانی
ایران کے صدر نے کہا ہے کہ ظہور اور انتظار، انسانوں خاص طور مسلمانوں اور شیعہ مسلمانوں میں امید و پیشرفت کا اہم ترین عامل ہے۔
اسلامی جمہوریہ ایران کے صدر ڈاکٹر حسن روحانی نے ثقافتی انقلاب کی اعلی کونسل کے اجلاس میں کہا کہ تمام ادیان الہی کا اس بات پر اتفاق ہے کہ منجی عالم بشریت کا ظہور ہو گا، اس دنیا سے ظلم و جور کا خاتمہ اور باطل پر حق کی فتح ہو گی نیز حکومت عدل کا قیام عمل میں آئے گا۔ انھوں نے کہا کہ مہدویت، اسلامی معاشرے میں نشاط، تحرک اور امید کا اہم ترین عامل ہے اور کمال کی جانب سماج کی رہنمائی و تربیت میں انتظار کی ثقافت کی صحیح منتقلی کا بنیادی کردار ہے۔ صدر مملکت نے مسلط کردہ جنگ میں خرمشہر کی آزادی کے لئے انجام پانے والی کارروائی فتح مبین اور حضرت امام زمانہ(عجل) کی ولادت باسعادت کے ایام کو مبارک قرار دیا۔ ڈاکٹر حسن روحانی نے کہا کہ فتح مبین کارروائی میں اسلام کے جانباز سپاہیوں کی کامیابی، ایرانی عوام کی عزّت اور قومی افتخار و فداکاری اور آہنی عزم و ارادے کا مظہر تھی۔ صدر مملکت نے ایران کے خلاف مسلط کردہ جنگ میں کامیابیوں کے مختلف پہلوؤں کا ذکر کرتے ہوئے تاکید کے ساتھ کہا کہ میدان عمل میں عوام کی بھرپور موجودگی اور رہبر انقلاب اسلامی کی رہنمائی و ہدایت کی بدولت، اسلامی جمہوریہ ایران اپنا ہر مقصد حاصل کر سکتا ہے۔
