امریکہ دوسرے ملکوں کے امور میں مداخلت نہ کرے: آیت اللہ موحدی کرمانی
تہران کی مرکزی نماز جمعہ کے خطیب نے امریکا کی تسلط پسندی کے مقابلے میں ایرانی قوم کی مزاحمت اور استقامت جاری رہنے پر تاکید کی ہے۔
تہران کی مرکزی نماز جمعہ، آیت اللہ موحدی کرمانی کی امامت میں ادا کی گئی ۔ آیت اللہ موحدی کرمانی نے اپنے خطبوں میں امریکا کو نصیحت کی کہ ایران کو دھمکیاں دینے اور دوسرے ملکوں کے امور میں مداخلت سے پرہیز کرے ۔ انھوں نے کہا کہ امریکا نے دھمکیاں دینے کا سلسلہ جاری رکھا تو ایران کے سخت اور شدید ترین جواب کا سامنا کرنا پڑے گا ۔
آیت اللہ موحدی کرمانی نے ایرانی اثاثوں پر امریکا کی ڈکیتی اور دو ارب ڈالر کی رقم ضبط کرنے کے اقدام کو امریکا کی جانب سے دوسروں کی دولت و ثروت کی لوٹ مار کا ایک نمونہ قرار دیا۔ انھوں نے کہا کہ امریکا کا یہ اقدام اس پر دوسرے ملکوں کا اعتماد ختم کر دے گا ۔ انھوں نے کہا کہ امریکا پر اعتماد ختم ہو جانے کی صورت میں دیگر اقوام امریکا میں اپنے اثاثے بطور امانت نہیں رکھیں گی ۔
تہران کی مرکزی نماز جمعہ کے خطیب آیت اللہ موحدی کرمانی نے کہا کہ ایٹمی مذاکرات میں امریکا نے مشترکہ جامع ایکشن پلان پرعمل کرنے کا وعدہ کیا تھا لیکن اس نے وعدہ خلافی کی ۔ انھوں نے کہا کہ امریکا کی وعدہ خلافی نے دنیا والوں کے لئے ثابت کر دیا کہ وہ قابل اعتماد نہیں ہے ۔
انھوں نے کہا کہ امریکا اور سعودی عرب سمیت مغربی اور بعض عرب ملکوں نے داعش اور دیگر دہشت گرد گروہوں کی مالی اور فوجی حمایت جاری رکھی ہے ۔ انھوں نے کہا کہ ان دہشت گرد گروہوں سے عراق ، شام اور یمن میں سامراجی منصوبوں پرعمل درآمد اورعوام کا قتل عام کرنے کے لئے کام لیا جا رہا ہے۔
تہران کی مرکزی نماز جمعہ کے خطیب آیت اللہ موحدی کرمانی نے اسلامو فوبیا اور ایرانو فوبیا کو امریکا اور صیہونی حکومت کا بنیادی ایجنڈا قرار دیا اور کہا کہ امریکا اس کام میں سعودی حکومت اور بعض دیگرعرب اورمغربی اتحادیوں سے کام لے رہا ہے۔
