اسلامی انقلاب کی کامیابی کی سالگرہ کی ریلیوں میں اس سال بھی عوام کی شرکت ایران کے لئے باعث فخر تھی

تہران کے خطیب جمعہ حجت الاسلام و المسلمین کاظم صدیقی نے نماز جمعہ کے خطبوں میں کہا کہ اسلامی انقلاب کی کامیابی کی سالگرہ کی ریلیوں میں اس سال بھی عوام کی شرکت ایران کے لئے باعث فخر تھی۔ انہوں نے کہا کہ اسلامی انقلاب کی کامیابی کی سالگرہ پر عوام کا غیر معمولی جوش و خروش اور جشن، پوری دنیا نے ایک بار پھر اپنی آنکھوں سے دیکھا۔ انہوں نے کہا کہ ایرانی عوام نے ثابت کر دیا کہ وہ اسلامی جمہوری نظام کے دفاع اور سامراج کی مخالفت میں بدستور اپنے راستے پر ثابت قدم ہیں اور وہ حضرت امام خمینی رح کے بتائے ہوئے اصولوں اور رہبر انقلاب اسلامی کی رہنمائیوں سے سر مو بھی انحراف نہیں کریں گے۔ تہران کے خطیب جمعہ نے آئندہ پارلیمانی اور مجلس خبرگان کے انتخابات کی اہمیت کا ذکر کرتے ہوئے کہا کہ عوام کو چاہئے کہ وہ اہل امیدواروں کا انتخاب کریں۔ انہوں نے اس یقین کا اظہار کیا کہ اس بار کے انتخابات میں بھی ایرانی عوام بڑھ چڑھ کر حصہ لیں گے۔ انہوں نے علاقے کے ملکوں منجملہ یمن، شام، بحرین اور عراق میں جنگ و خونریزی جاری رہنے پر تشویش کا ا ظہار کرتے ہوئے کہا کہ ہم امید کرتے ہیں کہ ان ملکوں میں جنگ ختم ہو جائے گی اور تکفیری دہشت گردوں کی نابودی کے ساتھ علاقے میں امن قائم ہو جائے گا۔