نتائج تبدیل کئے گئے، ووٹ خرید کر نواز لیگ نے بدترین دھاندلی کی، ڈاکٹر شجاعت حسین میثم

جی بی ایل 11 سکردو پانچ کھرمنگ سے مجلس وحدت مسلمین پاکستان کے امیدوار ڈاکٹر شجاعت حسین میثم نے حکمراں جماعت مسلم لیگ (ن) پر دھاندلی کا الزام عائد کرتے ہوئے کہا ہے کہ کھرمنگ کے مختلف علاقوں میں ووٹ خرید کر ہمارا مینڈیٹ چرایا گیا۔ اصل نتائج تبدیل کئے گئے، جن علاقوں میں مسلم لیگ (ن) کو انتخابی دفتر کھولنے کی جگہ میسر نہ تھی، سکردو سے لوگوں کو بلا کر دفتر کھلوائے گئے، نواز لیگ کا ان جگہوں سے سو سو اور ڈیڑھ ڈیڑھ سو ووٹ حاصل کرنا حیران کن ہے۔ معلوم نہیں یہ ووٹ کہاں سے آئے۔ ڈاکٹر میثم نے اسلام ٹائمز سے بات کرتے ہوئے کہا کہ حالیہ دنوں میں نواز لیگ نے ووٹ خریدنے کے لئے ڈیڑھ کروڑ روپیہ خرچ کیا، جس کے ٹھوس شواہد ریکارڈ کی گئی کالز کی صورت میں ہمارے پاس موجود ہے۔ جس میں مختلف علاقوں میں پانچ سے دس ہزار فی ووٹ دیئے گئے۔