شام اور عراق میں ہونیوالے واقعات ایک ہی سلسلے کی کڑیاں ہیں، آئی ایس او

امامیہ اسٹوڈنٹس آرگنائزیشن پاکستان کے مرکزی ترجمان ڈاکٹر تجمل نقوی نے کہا کہ عراق میں مقامات مقدسہ کی بے حرمتی کے بڑھتے ہوئے واقعات اسلام کے خلاف گہری سازش ہیں اور ایک بار پھر عراق کو دہشت گردی اور تکفیریت کی آگ میں دھکیلنے کی راہ ہموار کی جا رہی ہے، ان واقعات میں تکفیری، صہیونی اور سعودی عرب کی سازش کار فرما ہے۔ ڈاکٹر تجمل نقوی نے کہا کہ آج آئی ایس او کے مرکزی سیکرٹریٹ میں مرکزی کابینہ کے ہنگامی اجلاس میں قوی امکان ہے کہ آئی ایس او ملک گیر تحفظ مقامات مقدسہ تحریک کا آغاز کرے گی، جس میں ملک بھر کے تمام شہروں میں پرامن احتجاجی ریلیاں نکالی جائیں گی، جن کا مقصد اہل بیت اور اصحاب رسول سے محبت اور عقیدت کا اظہار ہے اور عرصہ دراز سے مقامات مقدسہ اور اصحاب رسول کے مزارات کی بے حرمتی کی سازش کے خلاف سراپا احتجاج ہونا ہے۔

انہوں نے کہا کہ شام او ر عراق کے اندر ہونے والے دل سوز واقعات ایک ہی سازش کی کڑی ہیں، لیکن افسوس اس بات کا ہے کہ اسلام کے نام نہاد ٹھیکیدار اور اسلامی تحریکیں اس ایشو پر مجرمانہ خاموشی اختیار کئے ہوئے ہیں۔ انہوں نے مزید کہا کہ آئی ایس او نے ہر دور میں اسلام کے خلاف ہونے والی سازشوں کا بھرپور مقابلہ کیا ہے اور ملک گیر تحریکیں بھی چلائی ہیں۔ آئی ایس او آج بھی اسلام کے خلاف ہونے والی تمام سازشوں کے خلاف سیسہ پلائی دیوار کی مانند کھڑی ہوگی اور تکفیری اور صیہونی سازشوں میں ملوث تمام گروہوں کا مکروہ چہرہ دنیا کے سامنے واضح کرے گی۔ ہم عوام اور آئی ایس او کارکنوں کو ان سازشوں کے خلاف ہمہ وقت آمادہ اور تیار رہنے کی تاکید کرتے ہیں۔