گلگت بلتستان میں جماعت کو فعال کیا جائے تاکہ تشیع کا تحفظ کیا جاسکے،علامہ ساجد نقوی
شیعہ علماء کونسل کے سربراہ علامہ سید ساجد علی نقوی سے شیعہ علماء کونسل ضلع گلگت کے ضلعی صدر شیخ شہادت حسین ساجدی کے زیر صدارت وفد نے ملاقات کی جہاں پر گلگت بلتستان کی مقامی ،سیاسی ،مذہبی اور تنظیمی صورتحال کا تفصیلی جائزہ لیا گیا۔ سیاسی صورتحال کا جائزہ لینے کے بعد علامہ سید ساجد علی نقوی نے علماء کرام کی کاشوں کو سراہتے ہوئے کہا کہ گلگت بلتستان میں عوام کے بنیادی حقوق کیلئے اسلامی تحریک پاکستان (شیعہ علماء کونسل پاکستان ) کی خدمات قابل قدر ہیں اور ہماری جماعت نے ہمیشہ عوامی حقوق اور قومی و ملی امور میں بنیادی کردار ادا کیا ہے اور آئندہ بھی عوامی حقوق کے لئے آواز بلند کرتے رہیں گے ۔
علامہ سید ساجد علی نقوی نے وفد سے ملاقات میں تنظیمی فعالیت اور تنظیمی امور کو منظم کرنے پر زور دیا ۔اور عوام سے کہا کہ جتنا ممکن ہو سکے گلگت بلتستان میں جماعت کو فعال کیا جائے تاکہ تشیع کا تحفظ اور عوامی حقوق کا تحفظ کیا جاسکے۔اتحاد و اتفاق کے حوالے سے علامہ صاحب نے تاکید کرتے ہوئے کہا کہ تمام مسالک کا احترام اور ایک دوسرے کو ایک لڑی میں پرونا،اتحاد و اتفاق کی فضا ء کو قائم کرنا ہماری ذمہ داری ہے ۔اور حکومت کو چاہیے کہ عوام کے بنیادی حقوق فراہم کریں تاکہ ملک میں ایک بہتر فضاء قائم ہوسکے ۔اس وفد میں شیعہ علماء کونسل گلگت کے ضلعی صدر شیخ شہادت حسین ساجدی ،جنرل سیکرٹری شیخ سلطان علی صابری ،سیکرٹری اطلاعات عارف حسین ، ضلع ہنزہ نگر سے شیخ شبیر حسین حکیمی،شیخ گلاب حسین شاکری ، شیخ محمد اقبال توسلی ،راولپنڈی سے شیخ حبیب الحسن سمیت شیعہ علماء کونسل کے مرکزی رہنما علامہ شیخ شبیر حسین میثمی آف سندھ ، علامہ سید ناظر عباس تقوی صوبائی جنرل سیکرٹری شیعہ علماء کونسل سندھ،علامہ شیخ جعفر سبحانی ڈویژنل صدر شیعہ علماء کونسل کراچی شامل تھے۔
