پیپلز پارٹی کو یہ مذاکرات قبول نہیں
پاکستان کی قومی اسمبلی میں قائد حزب اختلاف سید خورشید شاہ نے کہا ہے کہ حکومت نے طالبان سے سلمان تاثیر اور یوسف رضا گیلانی کے بیٹوں کی حوالگی کا مطالبہ نہیں کیا ، اس لئے پاکستان پیپلزپارٹی ایسے مذاکرات قبول نہیں کرے گی۔ایک بیان میں خورشید شاہ کاکہنا ہے کہ مذاکرات کے معاملے میں حکومتی رویے پر افسوس ہے۔حکومت مذاکرات میں ٹوئسٹ دینا چاہتی ہے،پاکستان پیپلزپارٹی نے مذاکرات کی حمایت کی تھی، لیکن حکومت کی جانب سے ایسا تاثر دیا جا رہا ہے کہ جیسے پی پی پی ان مذاکرات کی مخالفت کررہی ہے۔ پاکستان کےوزیر اعظم نواز شریف ان باتوں کا نوٹس لیں۔ان کاکہناتھاکہ فوج اورحکومت کے درمیان کشیدگی قابل تشویش ہے، بتایا جائے تناؤ کیسے پیدا ہوا اور کس نے پہل کی۔ پاکستان کی قومی اسمبلی میں قائدحزب اختلاف نے کہاکہ اتنے بڑے واقعات کے بعد بھی چودھری نثار”اسلام آباد محفوظ ہے ”کا ڈھنڈورا پیٹ رہے ہیں۔ وہ خودمحفوظ ہوں گے کیونکہ وہ بلٹ پروف گاڑی میں سفر کرتے ہیں۔